Joven ida mate iha Bairro-Pite tanba kareta soke

Kondutór kareta fuso  ida ho sapa matríkula 50-453 TL, husi kompañia Everise Warehousing and Transportation, soke mate joven ida ho naran Izidio  Bonifacio  iha Bairro-Pite, Díli, wainhira kondus motor Beat ida ho sapa matríkula G 7207 TL.

Enkuantu kareta  ne’e kondus  husi  motorista ho inisial LL, husi diresaun Bairro-Pite atu liu ba iha Hudi-Laran.

Asidente trâfegu ne’e akontese iha  Sesta (09/08/19)  mais ou menus tuku sanulu resin  12 meudia  oras Timor-Leste,  ne’ebé mak rezulta vitima Izidio  Bonifacio monu  ran barak sulin ba estrada halo vítima labele bo’ok-an, maibe  vítima iis iha hela.

Tanba  ne’e, membru Polísia Trânzitu no familia  desidi  transporta vítima Izidio  Bonifacio ba iha Hospital Nasionál Guido Valadares (HNGV) hodi hala’o tratamentu  emerjensia,  maibe dotór sira labele salva.

Hafoin asidente motorista LL ne’ebé mak kondus kareta halai  ba asegura iha Kuartel Unidade Espesial Bairro-Pite, hafoin  membru Polísia Tránzitu lori ba iha Kuartel PNTL Munisípiu Díli hodi submete ba prosesu investigasaun.  Enkuantu evidensia motor ho kareta asegura ona iha Polísia.

Motorsita  ho inisial  LL hateten, asidente  ne’e nia la espera, maibe  derepente de’it akontese.

“Ha’u  halai tuir ha’u nia dalan, maibe derepenti de’it motor tuir husi  kareta nia kotuk mak  kareta ninia gandengan  kait”,esplika  motorista LL ba GMN iha Kuartel Unidade Espesial Polísia Bairro-Pite, Díli. Motorista LL mós  prontu kolobora ho justisa no família sira.

Tuir família matebian ne’ebé informa via telefoni katak,  mate isin Izidio posibilidade transporta ba Holbelis, Suai  hodi hala’o seremonia funebre.avi