MKOTT ezije Estadu TL-Austrália hapara prosesu judisiál hasoru advogadu Bernard Collaery ho “Witness K”

Movimentu Kontra Okupasaun Tasi Timor (MKOTT) husu Estadu Timor-Leste (TL) ho Austrália atu hapara prosesu judisíal hasoru advogadu Bernard Collaery ho “Witness K”, ne’ebé oras ne’e hasoru hela prosekusaun judisiál husi governu Austrália.

Porta Voz MKOTT, Faustino Soares, sente hakfodak ho prosekusaun ne’e hodi argumenta katak, so ditadór  Soeharto Eis Prezidente Indonézia ne’ebé invade no okupa Timor-Leste mesak mak bele halo prosekusaun ida nu’udar ataka ida ba liberdade espresaun ba demokrasia.

“Timor-Leste prepara hela atu komemora aniversáriu referendu ba dala 20 bainhira Timor-oan sira ba vota esmagadoramente atu ukun rasik-an husi Indonézia nia okupasaun, no iha okaziaun TL ho Austrália mos sei ratifika tratadu Fronteira Marítima entre rai rua”,dehan Porta Voz MKOTT, Faustino Soares, liu husi konferensia imprensa ba jornalista sira sesta (09/08/2019) iha Farol Dilí.

Porta Voz MKOTT haktuir, atu labele hafoer selebrasaun 30 de Agusto tinan ne’e mak MKOTT husu ba Austrália nia jeneral advogadu atu hapara prosekusaun ne’ebé la’o hela, tanba iha loron 30 de Agostu tinan 2019 sei marka mos instansia importante iha relasaun  bilateral entre TL ho Austrália ba ratifikasaun tratadu fronteira marítima  nasaun rua nia.

Nune’e mos, Membru MKOTT, Celestino Gusmão, husu ba governu Austrália atu hatudu vontade diak hodi dada sai kazu advogadu Bernard Collaery ho “Witness K”, atu labele halo foer vontade diak ne’ebé Austrália ho TL hatudu ona iha akordu fronteira marítima.

“Ami husu atu Estadu rua iha fuan bo’ot nafatin hodi hatudu vontade iha relasaun bilateral entre Austrália ho TL ba oin sai diak liu hodi reprezenta dezezu povu TL ho Austrália, maibé karik Austrália mak la dada sai kazu Advogadu Bernard Collaery ho “Witness K” husi prosekusaun judisiál mak  MKOTT adapta ona hanesan programa luta ne’ebé kontinua”,afirma Membru MKOTT ne’e.

Celestino Gusmão subliña, Bernard Collaery ho “Witness K” parte integrante husi TL nia luta ba fronteira marítima, tanba  ne’e labele esklui. “Karik ita esklui mak hanesan ita bosok ita-nia a’an no segundu ita tau kores ba iha luta rezistensia kontra okupasaun Austrália nian, tanba ne’e labele nega istória ne’ebé parte integrante ba ita”,dehan Celestino Gusmão.Fel