Komunidade afetadu futuru KJ-PNTL hato’o reklamasaun ba PN

Komunidade afetadu hosi projetu alargametu Kuartel Jerál (KJ) Polísia Nasionál Timor-Leste (PNTL) iha Kaikoli, hamutuk ho Rede Ba Rai (RBR) hasoru malu ho komisaun A, ne’ebé trata asuntu justisa no konstitusionál, hodi hato’o reklamasaun.

Kooordenadór Nasionál Rede Ba Rai, Pedrito Vieira relata,  durante ne’e, governu seidauk koordena direita ho komunidade afetadu sira, hodi foti desizaun hamutuk, kona-bá direitu ba indemnizasaun, tanba ne’e husu Parlamentu Nasionál aproxima ho governu.

“Komunidade sira labele husik sira nia rai, tanba rai ne’e rai ne’ebé privadu, no mós rai ne’ebé mak iha provas, dokumentus no faktus sira ne’e hotu mak sai razaun katak sira labele.

Maibe komunidade sira la’os atu lakoi dezenvolvimentu iha Timor ne’e la’o, maibe presiza mak koordena malu didi’ak, hakbesik ba ita nia povu sira, halo konkordansia oinsa para para iha parte hotu-hotu iha konkordansia ba malu, presiza buka solusaun hamutuk ho sira.”subliña Pedrito Vieira ba jornalista iha PN, Kuarta(24/02/2021)

Portavoz komunidade afetadu, Rogerio Marçal, hateten, nia partre la’ós atu impede dezenvolvimentu, maibe Governu mak fó direitu atu sai nain ba rai, no Governu mós presiza rekoñese direitu refere, nune’e, komunidade afetadu sira ezije, atu hetan indemnizasaun ba rai hotu, la’ós uma no ai-horis de’it.

“Rai ne’e ami hela la’ós tinan 10 de’it, dezde ami nia biz avo Carlos Luis Pereira ne’ebé okupa kedas dezde 1922 ate a data, konta agora jerasaun dala lima tiha ona, se hanesan ne’e ami iha direitu ba rai ka la’e? Ami mós iha dokumentus komprovativu, katak ami ne’e bele sai nain ba rai. Iha 2012 governu ba sukat rai, foti dadus no entrega tiha dokumentus sertifikadu rejistu, no hateten iha ne’ebá klaru katak sai nain ba rai mak A ho B, fotografia klaru, sira la hateten iha ne’ebá katak nain ba rai mak Estadu, ikus fali nusa  mak la rekoñese. Sira hasai tan notifikasaun katak, komunidade atu abandona rai hela fatin ne’e ho voluntáriu, tanba rai ne’e estadu nian, ne’e justu kala’e?, tanba ne’e mak ami hakarak mai husu justifikasaun.”afirma porta-voz komunidade.

Ho nune’e, Prezidente komisaun A, deputadu Joaquim dos Santos, afirma, iha tempu badak komisaun sei konvida Ministru Justisa, atu bele diskute asuntu refere.

“Prosesu sei la’o hela, tuir ita-nia lei ne’ebé vigora ne’e, kuandu Governu atu hasai sidadaun sira-nia direitu ne’e, lalika ko’alia ba lei de’it, maibe tuir konstituisaun ne’e, artigu 54 iha númeru 4 ne’e ko’alia klaru iha ne’ebá, tenke ser justa indemnizasaun.”realsa Joaquim dos Santos.

Futuru edifísiu Kuartel Jerál PNTL ne’e, lansa ona fatuk dahuluk iha tinan 2016, No edifísiu ne’e, afeta komunidade uma kain 11, hosi aldeia 01, Suku Kaikoli.Say