Organizasaun g7+ estabelese ona nia sede representasaun permanente iha zona europeia iha Lisboa-Portugal ne’ebe hetan tulun husi Governu português liu husi câmara munisipal Lisboa.
Organizasaun g7+ nia existensia iha nasaun Portugal hodi sai hanesan centru hodi halo ligasaun ba áfrika atlantiku no mos europa.
“Ami fo honra bo’ot no rekonesimentu tamba portugal afirma ona nia politika externa hakarak kopera no ajuda nasaun seluk,” hateten Sekretaria Estadu Negosiu Estrangeiru no Koperasaun Portugal, Teresa Ribeiro hafoin partisipa inagurasaun sede g7+ iha Lisboa-Portugal 20/06/2018.
Governanate portuguesa ne’e hatutuan portugal hanesan nasaun ne’ebe respeitu direitus humanus no nasaun ne’ebe aposta mos multilateralismu no valoriza paz no toleransia ba ema hotu.
Portugal prontu apoiu inisiativa organizasaun g7+hodi estabelese sede ne’ebe oferese husi câmara munisipa Lisboa hodi fasilita atividade organizasaun ne’e nian.
Portugal mos laos sente kontente deit maibe honradu tebes tamba bele hili sidade Lisboa hodi estabelese nia sede ou hub regional organizasaun g7+ nian.
Sekretariu Estadu Negosio Estrangeiru ne’e hatutan liu tan iha politika externa portugal disponivel apoiu organizasaun g7+ nia atividade hodi ajuda nasaun frajil sira.
Iha parte seluk, sekretariu Jeral g7+, Helder da Costa lori grupu g7+ ne’ebe representa nasaun 20 agradese ba ba Estadu no Governu Português hodi apoiu estabelese sede iha europeia.
Nia informa liu tan ho estabelesimentu sede ne’e sei sai sentru hodi fahe informasaun nunee mos presta servisu ba nasaun frajil sira ne’ebe iha konflitu iha Áfrika no mos parseiru sira iha Amerika, europa no mundo tomak.
“Sede ne’e sai sentru partilla informasaun no promove mos ita nia susessu entermus de jere eleisaun, jere rekursus naturais, ita nia rezilensia, ita nia kultura no historia da luta ba rai sira seluk,” dehan Helder da Costa.
Tuir nia Estadu Portuguesa sente orgullu tebes ho prezensa organizasaun g7+ iha sidade Lisboa tamba Lisboa sai hanesan sidade ida multikultural, sidade ida ne’ebe pontu de entrada husi Áfrika, Europa no mos ba Amerika no cidade ne’ebe dinamika tebes.
Nune’e mos embaixadora Timor-Leste iha Lisboa, Maria Paixao hateten sede ne’e laos Timor deit, maibe membru g7+ hotu hodi halao atividade tamba ne’e nasaun membru hotu tenke sente hanesan nain.
“Estabelesementu sede ne’e hatudu ba entidade hotu katak g7+ nia sede hari’i ona iha Portugal, sede ne’e laos ba Timor deit maibe ba nasaun membru g7+ hotu atu sente hanesan nain bele halibur hamutuk iha sede ne’e hodi fahe sira nia duvidas ruma no halo servisu no atividade g7+ nian iha fatin ne’e,” dehan Maria Paixao.
Sede representasaun organizasaun g7+ ne’e hetan ona inagruasaun husi Sekretariu Estadu Negosiu Estrangeiru no Koperasaun Portugal, Teresa Ribeiro no Sekretariu Jeral g7+, Helder da Costa no akompana husi embaixadora Timor-Leste iha Lisboa, Maria Paixao iha Kinta (21/6) liu ba, ne’ebe partisipa husi korpu diplomatiku, komunidade Timorense no estudante sira iha Lisboa-Portugal. n2
