GMN TV Internacional Amo Belo: ha’u sei estudante, Dom Basílio simu ona ordenasaun saserdotál

Amo Belo: ha’u sei estudante, Dom Basílio simu ona ordenasaun saserdotál

1,660 views

Eis Administradór Apóstolika de Dioseze Díli, Dom Carlos Filipe Ximenes Belo hato’o ninia laran triste bainhira rona Bispo Diocese Baucau, Dom Basílio do Nascimento mate, tanba atake kardíaku.

Dom Carlos Filipe Ximenes Belo hato’o ninia sentimentu triste ne’e iha ninia pájina ofisiál Facebook ne’ebé GMN asesa.

Nia konta tuir kona-ba Dom Basílio bainhira sira hamutuk estuda iha  semináriu Nossa senhora de Fátima iha Dare, iha tinan 1964 no kontinua estudu iha Portugal to’o hetan ordenasaun saserdotál.

Bispu Dioseze Baucau, ho laran taridu há’u simu notisia katak amu Basílio do Nascimento iis-kotu iha Ospitál Guido Valadares tanba hetan “atakasaun fuan”. Ita hotu triste tan ba Dioseze Baucau iha tinan ida ne’e lakon Vigário Geral (padre Francisco Pinheiro) no Amo Bispu rasik.

Há’u hetan dala uluk, labarik no seminarista Basílio do Nascimento iha Semináriu de Nossa Senhora de Fátima, iha Dare, iha tinan 1964.

Iha tempu ne’ebá há’u frekuenta 3.º ano e nia hahú 2.º ano. Ami nia turma ka klase (3.º ano), ami na’ín walu (8) de’it: Carlos Filipe Ximenes Belo (Baucau), Francisco Aparício Guterres (Baguia), Hanrique Magno (Ainaro), Jaime Carion Lobo (Maubara), Lucas da Costa Gonçalves (Atsabe), Paulino Magno (Baguia), Paulo dos Santos Amaral (Fuiloro), Rogério Tiago Lobato (Soibada). La kleur, ami nia kolega balu husik Seminariu: Jaime, Lucas, Paulino, Francisco. To’o 6.ano, ami na’in haat de’it: Carlos Filipe, Henrique Magno, Paulo Amaral no Rogério Lobato. Hosi grupu ne’e, atan há’u mesak  to’o saserdósiu.

Dom Basilio sira nia turma (2.o Ano), turma ida ke boot: ema na’in 27. Ikus mai, balu sai ema bo-boot deit: Basilio do Nascimento (Bispo), Guido Diamantino Soares, Domingos Maria das Doares Soares (Colli), Francisco Ribeiro, Luís Monteiro, Antonino Gonçalves, no sira seluk tan. Iha sira nia let, iha ida, ema Lautém oan, naran Norberto Amaral, ne’ebé ulun mámar liu, no hetan notas ka valores (nilai) mesak áas (18,19, etc.). Ami na’i rua nia mak 12,13,14…Hosi grupu Dom Basilio nian, (27), nia de’it mak to’o saserdósiu.

Iha Semináriu de Dare, Superiores sira hili mai na’in rua (Carlos Filipe ho Basilio do Nascimento) atu hala’o knaar hanesan bibliotecário no despenseiro. Despenseiro nia dever ka tugas mak lor-loron hasai no sukat bátar ka’ut tolu ka haat, no entrega ba cozinheiro atu te’in…Loro-loron ami han bátar da’an…domingu ho feriadu mak  han etu. Han bátar da’an de’it, maibé seminarista sira hetan isin diak, bokur no ema kbiit na’in, to’o halo Kónsul australiano hakfodak, waihira nia ba vizita Semináriu!

Iha tinan 1968, Paulo dos Santos Amaral no Carlos Filipe, padre Afonso Nácher haruka atu  ba eskola iha Instituto Missionário Salesiano, iha Mogofores (Anadia, Portugal) atu sai salesiano.  Dom Basilio ho kolega seluk, amo Bispo Dom José Joaquim Ribeiro haruka ba Seminário Maior (diocesano), iha Évora (Portugal).

“Iha tinan 1977, wainhira há’ú sei estudante Teologia, (hela iha Manique do Estoril), seminarista Basílio do Nascimento simu oridesaun sacerdotal iha Sé de Évora, hosi Arcebispo Dom David, (OFM). Há’u ba assiste serimónia ordenasaun. See mak toka órgaun, mak seminarista timor oan ida naran Gelásio Joaquim da Silva (ema Fatubessi).Tuir mai, ami fahe malu, ida idak tuir nia destinu”

Iha 1985, atan há’u hanesan ona Administrador Apostólico Diocese Dili nian, ba buka padre Basilio iha Évora atu ko’alia. Iha tina 1990, há’u ba fali Portugal no ba  hasoru nia, no husu atu nia atu fila ba Timor.

Entretanto, iha “Timor Timur”, sarani sira aumenta ba beibeik, to’o 700 mil.

Finalmente, amu-lulik Basílio do Nascimento to’o Timor Timur 1994. Fou-foun nia simu knar atu na hela iha Ainaro. Ikus mai muda ba Dili. No iha tina 1996, Amu Papa João Paulo II (ohin loron, Santu), harii Dioseze Baucau no hili amu-lulik Basílio do Nascimento ba Bispu.

Iha loron 30, fulan outubru, 2021, Dom Basilio husik mundu ne’e, no fila hikas ba Na’in nia Kadunan.

Há’u mos triste, no laran taridu…Ami be la wale buat ida no sala na’ín (liu liu há’u)  mak Na’i Maromak hili atu tau matan ba Ninia povu. Dom Basilio ba uluk ona, loron ida,  há’u mos sei tuir…

Iha momento ne’e, há’u hanoin Mape, Zumalai, Aileu, Baucau; hanoin senhor Victor, senhora Teresa, hanoi Meno, hanoin Aileu…No reza ba Amu Basilio nia avó, nia inan, nia aman. No reza ba Meno do Nascimento no nia família, reza  ba povu Mape, Zumalai no Aileu. Reza  ba Diocese Baucau...

Ita atu dehan tan saída??? Oh!  Basílio, iha lalehan  husu tulun no bensa ba o nia kolega no belun ida ne’e…Carlos Filipe. ***


Banner

Foto

Notisia Ikus

PR Lú Olo fó Indultu ba Prizioneiru 11 no Kondekora Asua’in 52

November 29, 2021
Prezidente Repúblika (PR) Francisco Guterres L...

COVID-19 Loke Timor-oan Nia Neon Hadia Ekonomia Nasaun

November 29, 2021
Prezidente Repúblika (PR), Francisco Guterres L...

Lú Olo “rekoñese” Xanana mak hato’o Planu da Paz ba ONU hakotu konflitu iha TL

November 29, 2021
Prezidente Repúblika (PR), Francisco Guterres L...

Governu aprova pagamentu suplementár ba funsionariu no ajente MF

November 26, 2021
Governu sei halo pagamentu suplementár ba funsi...

Governu aprova estatutu orgánika F-FDTL

November 26, 2021
Liu husi reuniaun Konsellu Ministru (KM), deside...
1 2 3 666

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker