Prezidenti Tribunal Rekursu, Deolindo dos Santos hateten, atu kaptura autór sira ne’ebé komete kazu iha Timor Leste (TL) no halai ba estranjeiru presiza iha akordu estradisaun ho nasaun ne’ebé iha ligasaun. No akordu estradisaun ne’e kabe ba responsabilidade no polítika órgaun ezekutivu no lejislativu.
Prezidente Tribunal Rekursu, Deolindo dos Santos, hatutan akordu extradisaun ho nasaun viziñu sira, kabe ba polítika Governu no Parlamentu Nasional (PN), nian hodi halo akordu nee.
“Kona-ba ida ne’e hau hanoin esforsu ida ne’ebé tribunal halo prosesu iha tribunal bele foti desizaun, maibe kompetensia akordu extradisaun sira ne’e kabe ba kompitensia Governu nian oinsa bele haree no solusiona akordu ruma ho país ne’ebé ita iha ligasaun ba mais kestaun vontade polítiku hodi haree ba ida ne’e”, dehan Prezidente orgaun Judisiariu.
Deolindo dos Santos hato’o lia hirak ne’e, hafoin enkontru ho Prezidente Repúblika Francisco Guterres Lú Olo, iha palásiu prezidensiál Nicolau Lobato, Bairu Pite-Dili, Tersa (29/01/2019).
Nia hatutan kestaun tekniku Tribunal Rekursu bele fó informasaun no hanoin balun ba kestaun ne’e, maibe kazu ne’e konkretu kabe ba vontade politika governu no parlamentu.
Autór ne’ebé komete kazu iha Timor Leste, maibé halai tiha ba rai liur mak Eis Ministra Finansas Arguida Emilia Pires ne’ebé komete kazu krime administrasaun da noza, maibé Tribunál desidi absolve.
No kondena fali arguida ho kazu krime partisipasaun ekonómika no negósiu, relasiona ho projestu sosa kama ba Hospital Nasionál Guido Valadares no referál sira iha mandatu Governasaun Aliansa Maioria Parlamentar-AMP.
Eis Asesor Ministériu Finansas Bobbe Boye ne’ebé hetan mós kondenasaun husi Tribunál, tanba komete kazu lori halai osan Timor Leste ba Amerika.
Nune’e mos, Tiago Guerra Fong-Fong ho nia kaben Chang Fong-Fong komete kazu brankamentu kapital ho montante osan dolar amerikanu rihun walu, maibé ikus mai halai tiha mós ba rai liur.
Maski ema hirak ne’e halai tiha ba rai liur maibe, tanba Timor Leste to’o ohin loron seida’uk iha Akordu Extradisaun ho nasaun amigu sira iha mundu, nune’e difikulta Timor Leste atu lori fila autór sira ne’e mai julga tuir Lei Timor nian. Eus
