Tribunal Distital Díli (TDD), liu husi primeiru interogátoriu aplika medida koasaun aprezentasaun periódika ba arguidu ho inisial A, hodi aprezenta-án fulan ida dala rua, tanba deskonfia uza katana tá lezadu iha suku Fatuhada, Praia dos Coqueiros Domingu foin lalais ne’e.
Razaun Tribunal aplika medida koasaun ne’e, tanba arguidu deklara katak antes ne’e iha grupu ida maka ba iha arguidu nia uma.
Tuir Defensór Públiku husi arguidu, José da Silva aseita ho medida koasaun ne’ebé Tribunal aplika ba nia kliente, tanba adekuadu.
Entertantu ba kazu ne’e, Ministériu Públiku (MP) promove arguidu ba krimi rua (2), hanesan ofensas integridade fízika grave no krimi arma branka.
“MP promove ha’u nia kliente ba krimi ofensas, tanba hakanek ona lezadu, maibé ida ne’e sei iha prosesu investigasaun nia laran, tanba ne’e TDD aplika medida koasaun aprezentasaun periódika hodi aprezenta-án fulan ida dala rua, iha postu polísia ne’ebé besik hodi hein prosesu investigasaun”, dehan José da Silva.
Tuir kronolojia akontesimentu akontese iha loron 13, fulan ne’e, iha aldeia 01, suku Fatuhada, Postu Administrativu, Dom Aleixo, Munisípiu Díli, mais ou menus tuku 08:00 kalan, wainhira lezadu fuma hela sigaru derepenti arguidu mai husi kotuk ka’er katana hodi tá kedas iha lezadu nia kabás, maibé hafoin akontesimentu família transporta kedas lezadu ba óspital Vera-Cruz hodi hala’o tratamentu.
Audénsia julgamentu ba primeiru interogátoriu ne’e, prezidi husi juiza singular, Edite Palmira, MP reprezenta husi Prokurador, Nelson Carvalho no arguidu hetan asisténsia legal husi Defensór Públiku, José da Silva. ita
