Xefe Estadu Maior Jeneral F-FDTL Major Jeneral (Majen), Lere Anan Timur, husu Timor-oan ne’ebé involve-an iha artemarsiais ne´ebé Governu taka ona atu kontribui ba estabilidade iha nasaun ne´e, no labele koko Polísia Nasionál Timor-Leste (PNTL) ho FALINTIL Forsa Defeza Timor-Leste (F-FDTL) nia forsa.
``Artemarsiais labele fiar, Polísia ho forsa sei la rende ba artemarisiais, kuandu imi koko Polísia ho F-FDTL ne´e imi koko Estadu, Estadu nunka rende ba nia, Estadu ne´e Estadu ona``,esplika Xefe Estadu Maior Jeneral F-FDTL Major Jeneral Lere Anan Timur, liu husi diskursu Sesta (18/01/19), iha seremonia inaugurasaun Sentru Formasaun Polísia Munisípiu Ermera, Gleno.
Majen Lere mós lamenta no preokupa maka’as joven Timor-oan balun involve artemarsiais, maibe ba hala´o fali juramentu iha Repúblika Indonézia (RI).
``Artemarsiais, aban bairua Governu ténki halo ninia estatutu própriu para bele kompete iha mundu internasionál foti Timor nia naran la´os foti Indonézia nia naran, kuandu Timor ba halo fali juramentu iha ema nia rai, ema bolu ema dehan traidor, tanba o iha nasaun ida, patria ida, tanba saida mak o ba hamutuk fali ho bandeira seluk``,dehan Lere Anan Timur.avi
