GMN TV Justica e Segurança Lere: Sira ne’ebé hakarak fahe ami, kuidadu

Lere: Sira ne’ebé hakarak fahe ami, kuidadu

0 views

Xefe Estadu Maior Jeneral FALINTIL Forsa Defeza Timor-Leste (F-FDTL) Major Jeneral Lere Anan Timur, apela ba sidadaun Timor-oan hotu ne’ebé hakarak kria divizinizmu hodi fahe veteranu sira liu-liu lider nasionál sira hodi provoka malu, kuidadu.

Lere mos senti tristi ho deklarasaun reprezentante espesiál Governu ba asuntu petróleu, Kay Rala Xanana Gusmão,  ne’ebé hateten,  Prezidente Repúblika  (PR), Francisco Guterres ‘Lú Olo’ Sarjana supermie. Maibe liafuan ne’e, dalaruma ema sira ne’ebé lakohi ukun-an ne’e mak sokar tun-sokar sa’e hodi maun bo’ot Xanana koalia PR Lú Olo Sarjana Supermie.

“Ha’u nu’udar Jeneral  forsa armada  Timor-Leste akompaña saida mak akontese  horiseik (iha Sabadu/26/1/2019)  no ha’u tristi, hanesan mós  Prezidente Repúblika  sai vítima  tristi, ami veteranu hotu tristi, tristi tanba saida ohin loron  dala ruma ami ne’ebé mak terus hamutuk atu soe malu sira ne’ebé mak uluk la terus  dala ruma uluk hakarak ami nia mate, hakarak ami nia divizaun, hanesan oportunidade diak,  treinu diak atu aproveita fahe ami nafatin, mas ha’u dehan sira ne’ebé hakarak hanoin a’at kuidadu, pasiensia sempre iha nia limiti”,esplika Xefe Estadu Maior Jeneral FALINTIL Forsa Defeza Timor-Leste (F-FDTL) Major Jeneral Lere Anan Timur, ba jornalista sira Domingu (27/01/19),  hafoin partisipa misa agredesimentu  loron tranformasaun FALINTIL ba F-FDTL.

Lere hatutan, deklarasaun ne’ebé maun bo’ot Xanana dehan, PR Lú Olo sarjana supermie, afeta maka’as Prezidente Repúblika nu’udar Komandante Em Xefe forsa armada.

“Situasaun ne’ebé horiseik mosu  ha’u  hanoin katak,  moralmente psikolójikamente  afeta maka’as  ba  señor Prezidente Repúblika  nu’udar Komandante Em Xefe, nu’udar Prizdente primeiru homem  iha Timor-Leste.  Hanesan ha’u dehan  ita tenki fiar malu, ida  ne’e mak importante liu”,dehan Lere Anan Timur.

Lere Anan Timur,  deskonfia iha ema  balun mak  provoka  maun bo’ot Kay Rala Xanana Gusmão, hodi hasai lia hirak ne’e ba Prezidente Repúlika, Francisco Guterres ‘Lú Olo’.

“Ha’u hanoin  ha’u nia maun bo’ot Xanana laiha intensaun a’at ida, mas dala ruma situasaun  ne’ebé mak la’o  iha nia sorin-sorin  mak  provoka halo  ita-nia maun lori to’o pontu ida ne’e bolu nia alin  beik ten, bolu nia alin  Sarjana Supermie,  ami ai-laran de’it tolera i ami la lori  ba lia, mas agora  iha ambiente  ne’ebé mak diferente liu ai-laran ninian, ema ida-idak  espekula”,dehan Lere Anan Timur.

“Ha’u la iha afirmativu ida katak, ema ida ne’e iha situasaun ida ne’e iha nia kotuk, mas sé keta iha karik diak liu  prevene kedas agora du que aban-bairua  bele mós simu nia konsekuensia, ha’u hanoin katak, ami ne’ebé mai husi ailaran unidu nafatin, se ami fahe malu, ami  kontra prinsipiu ne’ebé mak uluk ami komunga iha ailaran, tanba prinsipiu ne’ebé mak jura iha ailaran ami jura ho ran ho isin duni, ami barak rihun ba rihun mate iha ami nia sorin,  tanba  ne’e mak ami moris ténki fiar ami nia kompromisu ne’ebé mak ami halo, imi ne’ebé mate, ami  ne’ebé moris sei fó valor  hodi fo dignidade ba imi-nia mate”, dehan Lere Anan Timur

Lere dehan, ohin loron veteranu sira ne’ebé sei moris mós, moris sem dignidade, moris sem valor, moris sem regálias. “Ha’u hanoin katak, husu ba maun bo’ot sira atu buka diálogu ne’e esensia demokrasia  nian, sem diálogu sem demokrasika  ne’e mak ha’u nia maun bo’ot lakohi diálogu mos, hanoin katak  nia hanoin nia hakarak ne’e atu lori nasaun ne’e ba diak, povu nia diak,  hotu-hotu nasaun nia diak”,dehan Lere Anan Timur.avi


Banner

Foto

Notisia Ikus

PR Lú Olo fó Indultu ba Prizioneiru 11 no Kondekora Asua’in 52

November 29, 2021
Prezidente Repúblika (PR) Francisco Guterres L...

COVID-19 Loke Timor-oan Nia Neon Hadia Ekonomia Nasaun

November 29, 2021
Prezidente Repúblika (PR), Francisco Guterres L...

Lú Olo “rekoñese” Xanana mak hato’o Planu da Paz ba ONU hakotu konflitu iha TL

November 29, 2021
Prezidente Repúblika (PR), Francisco Guterres L...

Governu aprova pagamentu suplementár ba funsionariu no ajente MF

November 26, 2021
Governu sei halo pagamentu suplementár ba funsi...

Governu aprova estatutu orgánika F-FDTL

November 26, 2021
Liu husi reuniaun Konsellu Ministru (KM), deside...
1 2 3 666

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker