Polícia Científica Iinvestigação Criminal (PCIC) detein suspeitu nain rua (2), nu’udár fen ho la’en, tanba deskonfia komete kazu burla agravadu, bosok ema na’in 27 no halo kobransa osan hodi ba servisu iha Australia.
Kazal ida ne’e, mane sidadaun Timor ho inisiál JE ne’e Funsionáriu Públiku (FP) no feto sidadaun Indonesia ho inisiál R.
Adjuntu Diretór Nasionál, Adino Nunes Cabral, hateten, kazal ida ne’e, PCIC kaptura flagrante delitu iha Bekora, loron 18, fulan ne’e no prende mós pasaporte 28 iha suspeitu nia rezidénsia iha Bekora.
Hafoin kaptura, lori ba detein iha sela detensaun PCIC, Caicoli-Díli durante oras 72, hafoin submete ba primeiru interogátoriu iha Tribunál Distritál Díli (TDD).
“Ita nia ekipa halo kapturasaun flagrante delitu ba suspeitu nain rua, ne’ebé ita presume ba krimi burla agravadu, ne’ebé sira halo ba meuida konvense vítima sira ilisitamente patrimónia hanesan pasaporte, hodi entrega ba suspeitu na’in rua. Ho ida ne’e ita simu informasaun husi vítima, ita halo kedas detensaun flagrante delitu, ita prende mós pasaporte 28, mas ho titular 27, ema na’in rua ho pasaporte rua ho titular ida deit, ida fali pasaporte elektrónika ao mesmo tempo ho pasaporte manual”, Adjuntu Diretór Nasionál ba GMN iha sala konferénsa imprensa Caicoli-Díli, Segunda (20-01-2020).
Adino akresenta, osan ne’ebé suspeitu sira halo kobransa ba vítima 27 ne’e, ho montante USD13.000 no ema hirak ne’ebé sai vítima ba aktu husi kazal na’in ida ne’e barak liu husi munisípiu Ermera, Bobonaro no Díli.
“Ita-nia sosiedade mai husi área remotas ladun iha koñesementu, entaun sai vantazen ba suspeitu atu aproveita patrimonialmente”, dehan Adjuntu Diretór Nasionál ne’e.
Tuir informasaun husi vítima ne’ebé lakohi públika ninia identidade ba públiku hateten, maske sira hatama sira-nia pasaporte no osan ba suspeitu sira, maibé to’o ohin loron sira la ba servisu iha Australia. avi
