Komandante PNTL munisípiu Díli Superintendente Xefe Armando Monteiro, husu ba komunidade Madohi atu kontribui ba estabilidade hodi lori dezenvolvimentu ba oin.
Komunidade Aldeia Terra-Santa Suku Madohi Postu Administrativu Dom Aleixo munisípiu Díli Tersa (07/01/20) realiza diálogu ho autoridade seguransa hodi prevene aktu krime.
Diálogu ne’e hala’o relasiona ho kazu tentativa omisídiu akontese iha fulan Dezembru tinan 2019, iha Aldeia Terra-Santa, ne’ebé mak rezulta joven ida hetan tá iha merkadu Karantina no membru F-FDTL ida mós hetan sona iha bairu Uma Mean.
Ho akontesimentu hirak ne’e komunidade Aldeia Terra Santa inisiativa realiza diálogu hodi buka solusaun ba problema ba oin sei prevene a’an husi aktu krime.
Komandante PNTL munisípiu Díli Superintendente Xefe Armando Monteiro, louva komunidade ho autoridade lokal ne’ebé mak organiza sorumutuk hodi kontribui ba estabilidade.
“Akontese problema iha loron 24 fulan Dezembru no sira haree akontesimentu ida ne’e sai mós hanesan lisaun ida ba sira nia bairu ida ne’e. Tanba ne’e mak sira organiza komunidade sira partisipa iha enkontru ne’e hodi apela ba ba juventude husi bairu seluk hodi nune’e kontribui ba estabilidade seguransa iha munisípiu Díli , liu-liu postu administrativa Dom Alexio ninian”,esplika Komandante PNTL munisípiu Díli Superintendente Xefe Armando Monteiro ba GMN hafoin partisipa iha diálogu ho komunidade Aldeia Terra-Santa.
Alende ne’e Xefe Suku Madohi Beranadino do Cristo, agradese ba komunidade sira ne’ebé mak organiza ona sorumutuk ida ne’e hodi buka solusaun ba sira nia problema ne’ebé mak akontese.
“Labele hanoin mak kadi katana, labele hanoin mak tuku rama ambon labele hanoin mak odiu vingansa hanoin konstrutivu hanoin diak oinsá ita hamutuk preokupa jerasaun foin sae sira ikus liu libertadu liberdade, ida mak ita nia liberdade”,dehan Bernadino do Cristo.
Marka prezensa iha diálogu ne’e. Alende komandante PNTL munisípiu Díli, administrador Postu Dom Aleixo, autoridade lokal Madohi Xefe Juventude Terra-Santa ho komunidade.avi
