Tribunál Distritál Díli (TDD) fó pena prizaun preventiva ba suspeitu ho inisiál CMB, tanba komete kazu tráfiku droga iha Timor-Leste.
TDD halo julgamentu priméira instánsia ba suspeitu kazu droga ne’ebé autoridade seguransa detein iha loron 15, fulan Janeiru, tinan nee, tanba lori droga ho típu sabu-sabu kilógrama (3,253), neebé importa husi nasaun Nigéria, liu husi aeroportu internasionál Nicolao Lobato, Comoro-Díli.
Hafoin julgamentu ikus iha tribunál, parte Defeza, Fernando da Costa hateten, hanesan defeza la konkorda ho desizaun tribunal ne’ebé aplika pena prizaun preventiva ba arguidu, tanba tribunál la haree rekezitu ne’ebé prevé iha Kódigu Prosesu Penál (KPP).
Maibé husi parte defeza hatutan, ne’e hanesan desizaun priméiru instánsia, tanba ne’e nia parte sei hatama fali rekursu ba tribunál.
“Iha fase de alegações Ministériu Públiku (MP) rasik husu ba tribunál aplika medida koasaun ne’ebé adekuadu ba krime ne’ebé imputa ba hau nia kliente, prizaun preventiva duni. Maibé hanesan defeza, tuir ha’u-nia intervensaun, ha’u hatete buat hotu-hotu laós haree ba ninia típo de crime deit ou moldura pena ne’ebé mak mais superiór de 3 anos, maibé haree mós ba rekezitu balun ne’ebé prense iha artigu 183 KPP, mais pronto, tanba ida ne’e ha’u husu ba tribunál bele aplika medida koasaun ba ha’u-nia kliente ne’e aprezentasaun periódika, advogadu privadu, Fernando ba jornalista sira iha TDD, Sábadu (18-01-2020).
Nunee iha audénsia priméira instánsia ne’e, MP akuza arguidu kontra lei númeru (2/2017), lei tráfiku no konsumu ilísitu ba droga.
Audénsia ba julgamentu ne’e prezide husi Juíz Singular, António Fonseca, MP reprezenta husi Prokuradór, Hernanio Rangél no suspeitu hetan asistensia legál husi Advogadu Privadu, Fernando da Costa. san
