Ministru Defeza no Interior Interinu, Filomeno Paixão, deklara, ema sivíl tá kanek membru Polísia ida iha área Ai-Mutin, Díli, ne’e milísia pro-Indonéziu Besi Merah Putih.
Tanba ne’e Ministru Defeza no Interior Interinu, Filomeno Paixão, kondena maka’as aktu krime ne’e. Filomeno Paixão hato’o lamentasaun ne’e relasiona ho kazu tentativa omisídiu ne’ebé involve ema sivíl kaer sasan kro’at hodi tá kanek Inspetór Polísia Honorio Horta Pinto iha Ai-Mutin Díli.
Tuir Filomeno Paixão, suspeitu ne’ebé mak involve iha kazu tentativa agora aumenta ba ema nain hitu, tanba Tersa (21/01/20), tuku 1 madrugada oras Timor-Leste, PNTL detein uluk suspeitu nain 6 no iha rai loron oras meudia PNTL detein tan suspeitu nain ida.
Suspeitu sira detein tanba involve kazu tentativa omisídiu hodi tá kanek membru Polísia ida iha Ai-Mutin.
“Iha ne’e ha’u hateten ema ida lalin ema sira ba tá ema ne’e, uluk iha 1999 halai tiha ba sorin (Atambua), ema ne’e Maubara, família husi ne’ebá, Besi Merah Putih (Milísia), sira ba tiha ona Atambua fila-fali mai iha 2001 invés de mai túr nonok, mai komesa halo fali ona’ ikus ne’e ha’u detekta ona sé mak halo buat sira ne’, ema sira lakohi ita hamutuk ne’e mak halo fali buat ne’e ona”,esplika Ministru Defeza no Interior Interinu, Filomeno Paixão, ba jornalista sira Kuarta (22/01/20) iha Palásiu Prezidensial Bairu-Pite, Díli, hafoin enkontru ho Prezidente Repúblika, Francisco Guterres Lú Olo.
Dadauk ne’e, suspeitu nain hitu detein hela iha sela PNTL munisípiu Díli, durante oras hitu nulu resin rua, hodi submete ba iha primeiru interogatóri iha Tribunal Distritál Díli
Tuir lei númeru 5/2017 armas brankas bandu ema kaer sasan kro’at hodi tá kanek no habadak ema seluk nia ida.
Maske akontese kazu krime sira ne’e akontese, maibé Governante, dehan sei la fó impaktu ba estabilidade nasaun.avi
