Membru Konsellu Polísiamentu Komunitária (KPK) hamutuk 300 husi Suku 12, munisípiu Díli nian simu pose hodi garante seguransa ba komunidade.
Seremonia tomada de posse ne’e hala’o iha Resintu Kuartel PNTL Caicoli , munisipiu Díli, Kinta (16/01/20) , ho juramentu ne’ebé mak lé husi Adjuntu Autóridade munisípiu Díli, Jeca Smith, hafoin akompaña lee tuir husi membru KPK sira.
Iha testu juramentu ne’e KPK sira deklara sei servisu ho voluntáriu no fó laran hodi servi seguransa iha Aldeia no Suku sira hodi kontribui ba paz estabilidade no dezenvolvimentu nasaun Timor-Leste.
Segundu Komandante Jerál PNTL Komisáriu Mateus Fernandes, espera ho tomada de pose ba membru KPK foun sira ne’e sei bele garante seguransa diak liu ba komunidade bele moris ho liberdade iha kapital Díli.
“Durante ne’e KPK iha Díli kuandu patrulla ne’e sira la’o ain de’it, maibé akompaña husi Ofisial Polísia Suku sai tama bairu fó seguransa diak ba ita nia komunidade bele moris hakmatek hanesan iha loron natal no tinan foun problema reduz , signifika ho membru KPK husi Suku 12 ne’ebé mak simu tan tomada de pose bele fó seguransa diak liu tan hodi fó liberdade ba ema tomak liu-liu iha kapital Díli”,esplika Segundu Komandante Jerál PNTL Komisáriu Mateus Fernandes, ba jornalista sira iha Caicoli PNTL munisípiu Díli.
Adjuntu Autóridade munisípiu Díli, Jeca Smith, husu membru KPK atu kaer metin kompremisiu de honra hodi bele halo prevensaun ba aktu krimi akontese iha Suku.
“Ha’u husu ba imi atua lori compromissu de honra ne’ebé mak ohin imi jura atu tau iha sede Suku atu nune’e imi tama sai odamatan boot imi bele hare, compromisso de honra atu garante seguransa iha Suku ne’e nia evidensia mak ita simu hodi lee ne’e para depois fó honra ba sira ne’ebé mak apoiu ita” dehan Jeca Smith.
Iha fatin hanesan Komandante PNTL munisípiu Díli Superintendente Xefe Armando Monteiro husu ba membru KPK atu servisu ho displina no pasiénsia hodi garante seguransa ba komunidade, tanba KPK servisu volontáriu.
“Atu implementa ida ne’e presiza disiplina pasensia ho konsensia ho nune’e it abele serve ita nia komunidade ho dignu. Ha’u mós la haluha hatoo parabens ba membru KPK ne’ebé mak simu pose nomós família komando PNTL munisípiu Díli,kolegas amigus juventude no estudante”,dehan Armando Monteiro.
Marka prezenza iha seremonia ne’e alende Segundu Komandante Jerál PNTL Komisáriu Mateus Fernandes, Xefe Suku 12 no membru PNTL munisípiu Díli.avi
