Ministru Defeza no Interior Interinu, Filomeno Paixão, konsidera Polísia Nasionál Timo-Leste (PNTL), fraku halo prevensaun ba problema sira, tanba problema akontese tiha hafoin sira to’o iha fatin akontesimentu.
Filomeno Paixão hato’o lia hirak ne’e relasiona ho problema entre joven sira iha tinan kotuk no kazu tentativa homesidu akontese tiha iha bairu sira, hafoin Polísia to’o iha fatin akontesimentu.
“Querdizer iha prevensaun mak ita fraku oituan, ita bele dehan tuir lolos deteksaun antes. Não querdizer ita laiha esforsu”,esplika Ministru Defeza no Interior Interinu Filomeno Paixão, ba jornalista sira Segunda (06/01/20) iha Ministériu Finansas Aitarak-Laran.
Ho akontesimentu hirak ne’e, Filomeno Paixão, garante tinan ida ne’e, membru PNTL sei halo prevensaun antes iha terenu.
“Ita hakarak iha 2020 ne’e bele avansu diak liu tan ho lei ne’ebé mak halo ne’e ho diploma ne’ebé mak fó sai ne’e bele hadia diak liu tan sira nia atuasaun”,dehan Filomeno Paixão.
Maske antes ne’e, Komandante Jerál PNTL Komisáriu Faustino Da Costa hateten, PNTL hala’o seguransa ba komunidade durante oras rua nulu resin hat, maibé kazu kontinua akontese.avi
