GMN TV Justica e Segurança PR husu Komponente Naval kombate atividade ilegál ■ Lere hakarak mantein disiplina

PR husu Komponente Naval kombate atividade ilegál ■ Lere hakarak mantein disiplina

85 views

Komponente Naval FALINTIL Forsa Defeza Timor-Leste (F-FDTL) hala’o nia aniversáriu ba da-20. Nune’e iha ámbitu komemorasaun aniversáriu ne’e, Xefe Casa Militar Prezidente Repúblika (PR) Fransisco Guterres Lú Olo hato’o mensajen Prezidente Répúblika nian katak, Forsa Naval tenke prontu hodi hala’o kana’ar iha área marítima nian hodi prevene no kombate atividade ilegál sira ne’ebé mak iha.

Iha loron ida ohin ne’ebé ita selebra aniversáriu Komponente Navál Forsa Defeza Timor-Leste nian ba dala ruanulu, nu’udar Prezidente Repúblika no Komandante Supremu Forsa Armada, ha’u hakarak hato’o lia-tatoli saudasaun no liafuan insentivu ba sira-ne’ebé loro-loron, ho profisionalizmu no dedikasaun tomak, serbisu iha instituisaun ida-ne’e hodi serbí nasaun.

Loron ohin ne’e imi-nia loron, imi hotu ne’ebé serbí Timor-Leste hodi defende interese nasaun nian iha Tasi, atu nune’e Timor-Leste no Timoroan sira bele uza Tasi ba sira-nia moris loroloron, la’ós de’it ba atividade militár, maibé mós ba sira-nia atividade ho natureza sivíl, ne’ebé inklui apoiu ba Autoridade Marítima Nasionál.

Dezafiu boot tebes ida, ne'ebé ita hasoru ohin loron, mak oinsá ita haree ita-nia relasaun ho tasi. Dezafiu boot ida-ne'e ezije Estadu atu fó prioridade loloos ba tasi ho governasaun di'ak. Haree ba dezafiu ne’e, mak labele duplika meius hodi hala’o knaar ida de’it no labele gasta rekursus saugati de’it, tanba ida-ne’e bele hanetik ita atu hetan susesu. Iha kontestu ida-ne’e mak Timor-Leste foin aprova modelu funsionál Autoridade Marítima nian, ho kompeténsia rasik, ne’ebé suporta hosi Komponente Navál nia rekursus umanus no materiais, hodi hatán no serbí di’ak liután interese sira nasaun nian.

Atu Estadu bele afirma ninia soberania no autoridade iha tasi, Komponente Navál tenke prontu atu hala’o knaar hodi prevene no halakon kriminalidade iha área sira-ne’ebé tama ita-nia jurizdisaun marítima, no mós hala’o asaun fiskalizasaun ba atividade peska iha tasi laran no mós iha rai-maran hodi garante kumprimentu ba lei, hadi’ak kondisaun seguransa ba sira-ne’ebé serbisu iha tasi laran, no tau matan ba ita-nia rekursu.

Hodi asegura katak nasaun uza loloos tasi, ita tenke fó ba Komponente Navál organizasaun ida ne’ebé matenek no fleksivel, ho meius ne’ebé modernu. Maibé importante liuliu mak asegura katak ninia rekursus umanus kualifikadu, treinadu no ho motivasaun a’as.

Ita presiza esplora Komponente Navál nia potensialidade sira, hanesan uza ninia kapasidade sira iha atividade hotu-hotu ho natureza militár no la’ós militár, atu nune'e Estadu bele aproveita rekursus nasaun nian ba nia asaun iha Tasi, ho dalan ne’ebé efisiente liután. Korpu Fuzileirus hanesan kapasidade ida hosi Komponente Navál, ho valór operasionál ne’ebé aas, no sai hanesan rikusoin ida duni ba Nasaun. Maski nune’e, ita tenke fasilita Forsa ne’e ho meius ne’ebé nia presiza atubele projeta ninia kbiit no seguransa iha tasi laran no rai-maran, no mós atu Forsa ne’e bele partisipa iha misaun apoiu ba ajuda umanitária no fó tulun iha situasaun katástrofe ka asidente ne’ebé de’it,” dehan, Xefe Casa Militar Prezidente Repúblika,  António Soares da Silva, “Mau Kalo” bainhira lé mensajen Prezidente Repúblika iha aniversáriu Komponente Naval F-FDTL ba da-20 iha Hera, Kuarta (12/01/2022).

Xefe Estadu mós enkoraja Komponente Naval, FALINTIL Forsa Defeza Timor-Leste, hala’o sira nia misaun ho diak hodi servi ba Estadu no povu Timor-Leste.

 “Povu Timor-oan rekoñese kontribuisaun importante ne’ebé Komponente Navál fó ba nasaun, la’ós de’it iha misaun soberania sira liga ho defeza militár no seguransa, hodi ezerse Estadu nia autoridade iha Tasi, maibé mós iha misaun interese públiku sira, ne’ebé fó apoiu diretu ba komunidade sira hodi tau matan ba sira-nia vida.

Tan ne'e mak ho votu esperansa iha futuru mak ha’u fó korajen ba imi atu serbí nafatin ita-nia Rai-Inan hanesan baibain. Ha’u fiar katak imi sei kontribui ba tane aas Komponente Navál, Forsa Defeza no Timor-Leste nia naran iha mundu,” Mau Kalo hatutan.

Lere husu Komponente Naval mantein  disiplina

Nuneé mos, Xefe Estadu Maior FALINTIL-Forsa Defeza Timor-Leste (F-FDTL) Tenente Jenerál Lere Anan Timur, husu Komponente Naval, atu mantein disiplina profisionál no lealdade ba instituisaun hodi hamorin naran iha mundu.

“Husu imi-nia profisionalizmu, husu imi-nia lealdade, imi-nia responsabilidade perante instituisaun  ida ne’e mak importante. Imi tenke sai profisionál, imi tenke hatudu ba mundu Timor-Leste biar foin harii nia  nasaun, maibé bele. So forsa armada mak lori nasaun ida nia naran ba liur, hanoin didiak imi-nia misaun CPLP ninian,  forsa apoia paz ONU ninian, imi mak ba hamorin  rai Timor Lorosae ninia naran, mas imi la professional imi sei hafoer rai timor-lorosae ou povu lorosae  nia naran. Entaun ida ne’e mak ha’u núdar imi nia komandante  biar ultimamomentu mas ha’u apela bai mi  estuda sai professional, lori nasaun Timor-Leste nia naran, naran ida ne’ebé morin, laran ne’ebé amiga para bele atria ema hotu”,esplika Lere ba jornalista sira, Kuarta (12/01/2022), hafoin partisipa seremonia aniversáriu Komponente Naval iha Hera.

Iha fatin hanesan, Komandante Komponente Naval Kapitaun Fragata João da Silva hateten, durante tinan 20, Komponente Naval hasoru dezafiu, kona-bá rekursu umanu, infraestrutura no finanseiru.

Tanba ne’e, nia husu ba Governu atu tau atensaun ba difikuldade sira  ne’e hodi hamenus difikuldade sira ne’e.

“Durante tinan 20 ita iha dezafiu barak, maibé principal ne’e tolu, rekursu humanus, infraestrutura finanseiru. Buat tolu ne’e kabe ba governu nia responsabilidade atu haree, liu-liu atraves kuartel jerál , Ministru Defeza mak resolve ba iha área principal tolu ne’e”, dehan.

Komponente Naval, harii iha tinan 2002, no iha tinan 2022, kompleta tinan 20, ho nia membru atus lima.ade/avi


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker