Xefe Estadu Maior Jeneral FALINTIL Forsa Defeza Timor-Leste (F-FDTL) Major Jeneral Lere Anan Timur hateten, instituisaun F-FDTL presiza meius hanesan ro patrullamentu hodi kontrola soberania tasi Timor. Tanba tuir Lere, bainhira Parlamentu Nasionál Timor-Leste ho Australia ratifika ona fronteira marítima rai rua nian mak teritoriu ne’e presiza asegura.
“Admirante Xefe Estadu Maior Jeneral Australia, uluk sei hanesan Jeneral, nia dehan kestaun seguransa soberania, ami respeita soberania Timor-Leste nian, ami la ultrapasa ona fronteira tasi Timor nian, ro ultrasapasa ka lae ita la hatene, tanba ita iha surat tahan dehan iha fronteira marítima, mas ita laiha seguransa”,esplika Xefe Estadu Maior Jeneral F-FDTL Major Jeneral Lere Anan Timur ba GMN, iha ninia rezidensia Farol Díli foin lalais ne’e.
Lere fó izemplu, “Ita halo uma ida presiza ema mak hela iha uma laran ne’e, sé lae samea ka samodok no fohorai bele tama fali uma laran. Ha’u hanoin katak, ita nia maun sira, la’os maun Xanana de’it, maibe lider sira uluk, sira iha preokupasaun, mas iha obstaklu ruma karik sira seidauk ultrapasa atu rezolve problema kona-ba tau meius hodi kontrola tasi Timor”,dehan Lere Anan Timur.
Lere fó ezemplu tan, kuandu komunidade halo toos, ténki halo lutu se lae animal tama bele estraga batar no ai-oan sira iha toos laran.
“Ne’e mak ha’u hanoin kestaun soberania ita ténki asegura, agora mina atu dada mai ita kestiona, sé mak atu ba seguransa mina matan iha tasi laran ne’eba, se mak atu seguransa ba pipeline atu dada mai ne’e, ezemplu terorista ruma mai atu halo kuak bele halo kuak de’it, tanba seguransa laiha”,subiña Lere.avi
