Polísia Nasionál Timor-Leste (PNTL) Munisípiu Díli, hala’o auto stop ka pasa revista durante kalan rua, hahú iha Sesta (09/02/19) no Sabadu (10/02/19), hodi prende sasan kro´at hanesan rama ambon tudik no seluk tan, ne´ebé mak lori husi motorista sira.
Pasa revista ne´ebé mak Polísia hala´o relasiona ho ema deskoñesidu ikus-ikus ne´e kaer rama Ambon hodi hana ema iha tempu kalan no problema entre artemarsiais iha bairu sira, ho situasaun ne’e halo komunidade pániku atu la’o iha tempu kalan.
Tanba ne´e Polísia hala’o razia iha kapital Díli hodi hapara kareta ho motorizada ne’ebé mak sirkula iha tempu kalan, atu prevene lori sasan kroat
Pasa revista ne’e hala’o iha Eskuadra Nain-Feto no Vera Cruz, Cristo-Rey no Eskuadra Dom Alexio, lidera husi Komandante Eskuadra sira. Alende ne’e reforsa husi Forsa Rezerva no Tranzitu Munisípiu Díli
Pasa revista ne’e hala’o iha área Balide, Becora, estrada ibun IOB, Aimutin Merkadu Comoro.
Tuir informasaun balun husi pesoal PNTL Eskuadra Nain-Feto no Dom Alexio katak, operasaun loron primeiru iha Sesta kalan konsege rekolla sasan kroat balun hanesan tudik no rama ambon, maibe evidensia hirak ne’e entrega hotu ba iha Ministériu Púliku.
Enkuantu pasa revista hala’o iha Sabdu kalan ne’e, Polísia Tranzitu prende motor rua, tanba komete infrasaun la uza kapaseti no laiha sapa matrikula.
Entretantu PNTL hala’o operasaun ne’e bazeia ba lei numeru 5/2017, armas brankas.
To´o Notísia ne’e hatun seidauk hetan konfirmasaun husi Segundu Komandante PNTL Munisípiu Díli Superintendente Asistente Euclides Belo.avi
