Unidade Espesial Polísia (UEP), Segunda (11/02/19), apaga ona letra ne’ebé komunidade Kuluhun espresa sira ninia sentimentu hodi hakerek liafuan insulta PNTL iha moru liga ba oknum Polísia nain rua tiru mate Joven nain tolu no hakanek ema nain Lima iha Kuluhun de Baixo iha Domingo 18 fulan Novembru tinan 2018.
Liafuan sira mak komunidade sira hakerek mak kondena makas atetude membru Polísia nain rua husi Servisu Informasaun Polísia ho inisial JM no CQ husi Servisu Informasaun Polísia Unidade Maritima, ne’ebé mak deskonfia sai hanesan autor asasinatu iha Bairu Kuluhun de Baixo Eskuadra Nain-Feto, Munisípiu Díli.
Alende ne’e eziji ba instituisaun PNTL atu halo lei ne’ebé mak forte hodi regula pesoal Polísia labele utuliza sala armas hodi hamate komunidade.
Durante fulan tolu letra sira husik hela de’it/ laiha ema ruma mak ba pagahamos. Tanba ne’e Komandante Unidade Espesial Superintendente Xefe, organiza ninia membru UEP hodi apaga hotu letra sira mak marka iha moru lolon área Kuluhun.
“Ha’u hanoin tempu ona ba ita atu hamos letra sira ne’e, liafuan sira ne’e hatudu imazen ladiak mós ba instituisaun PNTL, ema estranzeiru ruma mai karik hare’e liafuan hirak ne’e ema ida rua la gosta servisu PNTL ninan, maibe la’os komunidade hotu. Ha’u hanoin katak, ami koordena tiha ona ho familia vitima sira katak, ema tersera pesoa mak marka letra sira ne’e, maibe ami labele fó sala ba sé de’it. PNTL ténki simu buat sira ne’ebé mak komunidade hatoo, PNTL ténki hatudu ninia profesionalismu”, esplika Komandante Unidade Espesial Superintendente Xefe Afonso dos Santos, ba GMN Segunda (11/02/19) iha Díli Mart Bidau Díli.
Afonso dos Santos hatutan, hamos letra sira iha moru lolon ne’e inisiativa husi UEP, hanesan ezemplu di’ak hodi hatudu ba komunidade ba futuru labele marka tan moru sira hodi insulta PNTL.
“Tanba ida halo atuasaun brutalismu sira ne’e la’os Polísia hotu, maibe problema pesoal PNTL. Ita temi PNTL ne’e Polísia hotu kedas, ha’u hanoin pesoal iha tempu ne’ebá halo atuasaun la ho profesional, ita hotu iha lei nia okos, agora sira ba kumpri ona iha prizaun Preventiva iha Becora, ne’ebé ita hein lolos bainhira mak disizaun lolos husi Tribunal Distrital Díli”,dehan Afonso dos Santos.avi
