Membru FALINTIL-Forsa Defeza Timor-Leste (F-FDTL) nain 23 tuir kompetisaun tiru hodi partisipa iha Australian Army Skill at Arms Meeting (AASAM) iha nasaun Austrália.
Kompetisaun tiru ne’e realiza iha Kinta (13/02/20) iha sentru karega de tiru F-FDTL iha Metinaro Díli. Alvu ne’ebé mak membru F-FDTL tiru ho distánsia 25 metru, uza kilat M16.
Komandante Sentru Formasaun Treinu F-FDTL Koronel Cesário Marcal Ximenes ‘Haksolok’ hateten, membru sira sei ba partisipa kompetisaun tiru alvu iha Austrália hamutuk ho nasaun 21 inklui membru F-FDTL nain 10.
Komandante komponente ne’e agradese, Adido Austrália iha Timor-Leste, tanba bele apoiu F-FDTL partisipa iha ezersísiu AASAM.
“Ezersesiu AASSAM hala’o tinan-tinan, hanesan ohin ha’u koalia ne’e suporta husi Austrália, prinsipalmente Adido Austrália iha Timor-Leste. Ezersísiu ne’e regular ona, kuandu Austrália la fó ita sei la ba, maibé tinan-tinan mak Austrália haruka ita ba, querdezer ita halo preparasaun iha Timor-Leste, depois halo kompetisaun tiru hili sé mak liu ba partisipa, sé mak la liu hela hodi bele treinu nafatin hodi partisipa iha tinan oin”,esplika Komandante Sentru Formasaun Treinu F-FDTL Koronel Cesario Marcal Ximenes ‘Haksolok’, ba jornalista sira iha fatin karegatiru F-FDTL Metinaro Díli.
Alende ne’e Komandante Team AASSAM Joel de Jesus, hateten, husi kompetisaun tiru ne’e, iha membru nain 10 hetan selesaun hodi ba partisipa kompetisaun tiru iha Austrália.
“Ha’u atu informa de’it Pesoal ne’ebé mak liu iha nain 10, inklui rezerva nain rua, ne’ebé mai husi komponente Naval nain hat, komponente Terrestre nain ida, komponente treinu nain tolu, Komponente Apoiu Servisu nain ida no Polísia Militar nain ida.Rezerva nain rua, mak husi komponente Naval no komponente Treinu nian”,dehan Joel de Jesus.
Nia durante formasaun aplika tipu de tiru tolu mak hanesan pratika tiru rapidu ho kilat M16, iha distánsia 25 metrus iha fatin granada ninian no iha segundu prátika kombate tiru besik ninian ho distánsia 10 metrus nafatin iha lansa granada ninian.
Membru F-FDTL nain 10 ne’ebé mak hetan selesaun, sei aranka ba Austrália iha loron 21 fulan Marsu no sei fila-fali mai Timor-Leste iha loron 5 fulan Abril tinan 2020.avi
