Polísia Nasionál Timor-Leste (PNTL) munisípiu Díli, detein joven na’in lima, ne’ebé envolve iha konfrontu entre joven sira iha Bekora. Kazu ne’e akontese Kinta (06/02/20) mais ou menus tuku 9 kalan oras Timor-Leste.
Komandante PNTL munisípiu Díli, Superintendente Xefe Armando Monteiro hateten, konfrontu entre joven sira ne’e akontese iha Bekora, hafoin joven sira fila husi seremonia funebré ba mate isin iha Hera.
Iha akontesimentu ne’e, PNTL deteín joven nain lima hodi iha sela detensaun hodi submete ba prosesu investigasaun.
Tuir Armando, joven nain lima ne’e ténki detein oras hitu nulu resin rua, tanba viola lei númeru 5/2017, armas branka.
“Seremonia funébre ba ema sira ne’ebé mate involve iha asidente trafégu iha área Hera iha loron rua liu ba, wainhira joven sira fila husi Hera mai to’o iha Terminal Bekora hetan provokasaun hodi halo asaun ba malu. Tanba ne’e membru Eskuadra Polísia Cristo-Rey inklui postu Polísia Hera no hetan apoiu husi Eskuadra Polísia Nain-Feto no membru Bataliaun Ordem Públik halo atuasaun emidiata hodi kaptura autór provokadór nain lima, horikalan kedas ita halo investigasaun”,esplika Komandante PNTL munisípiu Díli Superintendente Xefe Armando Monteiro, ba jornalista sira Sesta (07/02/20) iha nia kna’ar fatin Díli.
Armando Monteiro akresenta, husi akontesimentu ne’e alarga mai iha área resintu Universidade UNITAL, hodi kontinua mai too iha área Aitarak-Laran, maibé Polísia konsege normaliza.
Iha akontesimentu ne’e rezulta vítima nain rua kanek, maibé tuir informasaun husi komandante PNTL Díli ne’e konsidera ema nain rua ne’e ninia estatutu hanesan vítima no suspeitu, tanba Polísia halo intervensaun mós sira nain rua.avi
