Xefe Estadu Maiór F-FDTL Majór Jenerál Lere Anan Timur, konkorda oitavu governu réativa atividade Grupu Arte Marsiál (GAM) Kmanek Oan Rai Klaran (KORK), Persaudaran Setia Hati Terate (PSHT), Ikatan Kera Sakti (IKS) no arte ritual sira.
Antes ne’e governu hasai rezulusaun núméru 16/2013 hodi taka eis grupu arte marsiál Kmanek Oan Rai Klaran (KORK), Persaudaran Setia Hati Terate (PSHT), Ikatan Kera sakti (IKS) no arte ritual sira, maibé iha Kuarta (19/02/20), governu liu husi reuniaun Konsellu Ministru iha Palásiu Governu reativa artemarsiál tolu no arte ritual sira.
Ho polítika oitavu reativa eis arte marisiál no arte ritual sira ne’e, Lere konsidera vantazen diak, maibé presiza kria sistema no regra no implementa lei armas brankas númeru 5/2017 atu bele prevene husi sasan kroát.
“Ha’u sempre dehan katak, autóriza, arte marsiál ne’e ema Indonézia mak tau iha ne’e, la’os ita nian, tanba ne’e mak sira ba jura iha Indonézia ne’ebá ne’e, ne’ebé ida ne’e hanesan vantajen ida ita bele organiza no bele kontrola sira, maibé presiza sistema no regra no lei ida atu bele kontrola grupu arte marsial tolu ne’e”,esplika Xefe Estadu Maiór F-FDTL Majór Jenerál Lere Anan Timur, ba jornalista sira Sesta (21/02/20), hafoin asisti enseramentu kuartu kursu Ofisiál Superiór PNTL no F-FDTL iha salaun CNE Larigutu Caicoli Díli.
Líder masímu instituisaun F-FDTL ne’e akresenta, ho ré ativa eis artemarsiál tolu no arte ritual sira fasil ba PNTL no F-FDTL bele kontrola.
“Ha’u bele dehan KHUNTO mai husi KORK sira, sé réativa mós ita bele kontrola, tanba ninia boot ne’e ema polítiku partidu KHUNTO, kuandu problema ruma dehan KORK, ita ba alin Naimori, ne’e o nia ema baku malu ne’e nusa”,dehan Lere.
Lere mós husu ba governu atu kontaktu mós ho parte Indonézia, tanba artemarsiál mai husi Indonézia hanesan PSHT no IKS.
“Ita tenki kontaktu ho Indonézia liu-liu Ministru Defeza ha’u nia maluk Prabowo, ha’u rona Ministru Prabowo mak nain ba iha SH ka lae, ha’u brani prontu kontaktu ha’u nia kolega ne’e, sé ami nia ema mai halo juramentu iha imi nia rai, imi nia posizasaun saída, para sira bele ajuda ita kontrola situasaun”,dehan Lere.avi
