Provedoria Direitos humanos e Justiça (PDHJ) rejista kazu Violasaun Direitu Umanus (VDU) ne’ebé deskonfia envolve husi membru Polísia Nasionál Timor-Leste (PNTL) no edukadór eskola balun.
“Envolvimentu membru PNTL iha VDU ne’ebé akontese hanesan iha munisípiu Baucau, Lautem no Liquiça, Diretór eskola halo Violasaun Sexual (VS) ba estudante ne’ebé akontese iha munisípiu Baucau, munisípiu Manufahi no munisípiu Díli, no mós profesór sira obriga estudante hemu tua iha eskola. Ha’u temi kazu ne’ebé mak iha relasaun ho kazu VDU kazu 4 seluk ne’ebé investigadór sira konklui“,Provedór interinu PDHJ, Miguel de Carvalho liu husi ninia diskursu iha salaun PDHJ, Caicoli-Díli, Kinta semana ne’e.
Nia akresenta, husi kazu hirak ne’e iha relatóriu investigasuan husi PDJH konklui katak, Diretór Eskola halo duni VS ba estudante sira, nune’e afeta ba liberdade estudante nini’an, tanba halo violasaun fíziku no psikólojia.
“PDHJ rekomenda espesilamente ba Ministériu Edkuasaun Joventude no Desportu (MEJD), Komisaun Funsaun Públika (KFP), Ministériu Solidariedade Sosiál no Inkluzaun (MSSI), inklui mós Komisaun Nasionál Direitu Labarik (KNDL), nune’e fo formasaun ba profesór sira atu bele halo sira-nia funsaun tuir regra, halo investigasaun kle’an ba Diretór refere no entrega manual Direitu Umanus iha eskola, nune’e profesór sira respeita no proteje estudante sira-nia direitu”, tenik Miguel.
Entretantu iha tinan 2020, PDHJ rejista mós kazu 24, kompostu husi kazu violasaun kontra direitu umanus, kazu rai, violasaun hasoru estudante no boa governasaun. ety
