GMN TV Justica e Segurança PN husu KomJer PNTL foun servisu tuir lei

PN husu KomJer PNTL foun servisu tuir lei

0 views

Parlamentu Nasionál (PN), husu ba Komandante Jeral (KomJer) Polísia Nasionál Timor-Leste (PNTL), foun atu servisu tuir lei no orden ne’ebé vigora ona no tenki imparsial.

Prezidente komisaun B, ne’ebé trata asuntu defeza no seguransa iha PN, deputadu Adérito Hugo da Costa, hatete, Komisáriu foun PNTL atu kontinua servisu profisional hodi atrai konfiansa povu nian.

“Prosesu la’o ho di’ak, ita apresia tebes prosesu promosaun ba kargu ida ne’e, to’o tiha ona nível Konsellu Ministru prosesu ida saúdavel loos. Ita hein katak, ho prosesu ida ne’e, kona-ba konstinuasaun profisionalismu iha setór PNTL nian, kontinuasaun ne’ebé mais professional, mais iha atuasaun ne’ebé profesionál no efetivu, nune’e bele kontribui ba konfiansa povu nian. Importante liu mak instituisaun PNTL ne’e tenki rekoopera no kontinua hamrik no fó mensajen ba públiku katak, bainhira públiku iha konfiansa”, hateten Adérito Hugo ba jornalista iha PN, Kinta (14/03/2019) ne’e.

Adérito Hugo garante katak, ho prezensa Komisáriu foun, servisu polísia nian sei bele di’ak liutan, no sempre iha ba komunidade nia leet kualker tempu, hodi asegura komunidade nia moris.

“Ita fiar katak, ho figura ne’ebé hetan promosaun, ho konfiansa ne’ebé prosesu promosaun ne’e bele kontribui ba futuru instituisaun, PNTL mais apropriadu no profesional, nune’e rezulta ba servisu polisiamentu nian ne’ebé di’ak. Polísia tenki marka prezensa iha komunidade nia le’et, nune’e komunidade bele sente moris seguru”, katak Hugo.

Alende ne’e, deputadu bankada PLP, Francisco de Vasconcelos, mós, kongratula Komisáriu PNTL foun, no sujere atu bele servisu ho neutralidade, bainhira atúa situasaun, hodi gaña konfiansa sidadaun nian, no asegura komunidade moris hakmatek.

“Ita fó parabens ba komandante PNTL ne’ebé mak Konsellu Ministru nomeia ona, importante mak komando tenki kumpri lei no regras, hodi nune’e bele aplika ba sidadaun sira, tanba ita haree tinan ida iku-ikus ne’e, kriminalidade ne’e ás oituan, ema kaer rama ambon, fatuk, tuda malu, kuaze vítima mós barak, maibé ita kontinua fó fiar nafatin ba ita-nia polísia. Ne’e dezafia bo’ot ida ba polísia, nu’udar país foun ida, ita infrenta problema barak, maibé ita tenki fó fiar ba sira (PNTL), liu-liu povu Timor-Leste tenki fó fiar ba PNTL”, katak Vasconcelos.

Deputadu PLP ne’e mós husu ba Komisáriu PNTL foun atu aplika lei  ho loloos, liu-liu ba sira ne’ebé kométe krime, tenki lori ba iha prosesu judisiáriu.

Reprezentante povu ne’e afirma, problema ne’ebé mosu iha tempu agora, nu’udar dezafiu bo’ot ba komando foun.

Tanba ne’e, Francisco Vasconceilos  rekomenda ba komandante jeral PNTL foun atu servisu maka’as no aplika lei ho rigorozu, hodi limite fatin ba kriminozu sira halo krime.
“Dezafiu bo’ot ba komandante foun, tanba problema mosu bar-barak iha ikus-ikus ne’e, ema sona malu no oho malu, ne’e mak dezafius ba PNTL, liu-liu komandante nain rua ne’ebé foin mak asume kargu PNTL nian, tenki servisu maka’as liutan, para kombate ida ne’e. Polísia tenki servisu maka’as liutan, ida uluk servisu di’ak ona, maibé polísia tenki toma responsabilidade nafatin, liu-liu tenki hatudu neutralidade hodi atúa problema sira, para minimiza problema, maske ita lakonsege halakon, maibé pelumenus minimiza, sela’e ema barak mak haree, hanesan turista, sira mai haree ema posting foto rama ambon kona ema, oho malu, ne’e ema mosu pergunta barak”, katak Vasconcelos.

Tanba ne’e reprezentante povu husi bankada PLP ne’e husu nafatin ba PNTL atu aplika lei no ordem ho rigorozu, tanba Estadu lalika lakon fali ho kriminozu, Estadu tenki iha korazen, iha poder tomak,  tanba  polítiku sira fó konfiansa tomak ba PNTL hodi atúa situasaun sira ne’ebé kria instabilidade ba.

Enkuantu, mandatu atúal komandante jerál PNTL Julio Horanay, sei termina iha loron 27 fulan Marsu tinan ne’e, no Komisáriu foun ho nia adjuntu ne’ebé nomeia husi Konsellu Ministru, sei simu posse iha tempu badak.say

 


Banner

Foto

Notisia Ikus

PPN-Konselleiru KHUNTO deskute plataforma entendimentu OJE 2022

September 24, 2021
Konselleiru máximu Partidu KHUNTO, José dos Sa...

Posibilidade semana oin, Governu sei la estende tan SS iha Díli

September 24, 2021
Diretór Sala Situasaun Sentru Integradu Jestaun...

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker