GMN TV Justica e Segurança PPN Arão Noe husu adjuntu PDHJ servisu ho imparsiál

PPN Arão Noe husu adjuntu PDHJ servisu ho imparsiál

0 views

Miguel Pereira de Carvalho ho Venicia Iriana Magno, eleitu ba adjuntu Provedoria Direitu Umanu no Justisa (PDHJ-sigla Portugés). Tanba ne’e, Prezidente Parlamentu Nasionál (PPN), Arão Noe Amaral, husu adjuntu provedoria eleitu na’in rua ne’e atu bele serví nasaun ho imparsiál no independente, liu husi kna’ar ne’ebé Parlamentu Nasionál fó fiar ona.

“Ofisíalmente ita iha ona adjuntu provedor nain rua, ne’ebé sei servisu hamutuk ho Provedora Jezuinha Mária, hodi servisu maka’as promove ema nia direitu, no governasaun di’ak iha ita-nia rai doben Timór-Leste ne’e. Parlamentu Nasionál iha esperansa katak, ho nomeasaun ba adjuntu sira ne’e, sei fasilita liutan funsionamentu PDHJ nian, hodi responde ba reklamasaun husi sidadaun sira, nomós liu-liu intensífika liutan edukasaun no formasaun iha área direitus humanus, no governasaun di’ak iha ita-nia rain”, hateten Arão Noe Amaral liu husi nia diskursu iha seremónia tomada de posse ba adjuntu na’in rua ne’e, iha PN Kinta(28/02/2019).

Líder órgaun lejislativa ne’e rekomenda ba adjuntu PDHJ na’in rua ne’e atu  servisu tuir kompetensia ne’ebé preve iha konstituisaun RDTL.

“Ita nia konstituisaun fó kompetensia tomak ba PDHJ, atu apresia no buka atu satisfaz sidadaun sira-nia reklamasaun, hasoru poderes polítika sira-nia injustisa, liu husi verifikasaun hahalok injustisa, tuir lei ne’ebé iha, ba prevensaun hahalok injustisa nian, ka inisia prosesu sira ne’e hotu, atu hetan reparasaun ba hahalok injustisa sira. Funsaun ida ne’e importante tebes hodi asegura Estadu nia papel hodi proteze sidadaun sira husi hahalok injustisa. Tanba ne’e, iha planu estratéjiku dezenvolvimentu nasionál 2011-2030, ba setór justisa nian, Timór-Leste buka atu atinji vizaun ida katak, sidadaun hotu tenki asesu ba justisa ho baze respeitu ba direitu humanu, no respeitu ba direitu Estadu”, katak Arão.

PPN ne’e afirma, atu atinji vizaun ida ne’e, planu estratéjiku dezenvolvimentu nasionál preve ona papel PDHJ nian, hamutuk ho instituisaun estadu sira seluk, hodi kontribui ba esforsu sira atu atinji méta ida ne’e.

Arão Noe kompromete, PN nu’udar uma fukun no segundu órgaun soberanu, sei kontinua halo no asegura polítika ne’ebé garante sidadaun hotu nia direitu fundamental.

PN mós kontinua buka halibur forsa polítika hotu, atu halo polítika ne’ebé bele asegura instituisaun Estadu sira-nia servisu, inklui PDHJ atu garante governasaun di’ak iha TL.

Iha fatin hanesan, Provedora Jesuina Maria Gomes mós husu ba provedor adjuntu nain rua ne’e, atu bele serví no hala’o funsaun tuir buat ne’ebé hatur iha artigu 17 pontu 1, husi lei númeru 7/2004 nian.

“Ekipa juiz hodi halo selesaun ba adjuntu provedor, ho prinsípiu governasaun di’ak, no prinsípiu país, kona-bá kompozisaun instituisaun nasionais PDHJ nian, liu husi forma transparente no imparsial. Provedor adjuntus sei hala’o sira nia funsaun iha tempu tomak no tempu inteiru tuir artigu 17 pontu 1, husi lei númeru 7/2004, kona-bá inkompatibilidade”, tenik Jesuina.

Tuir Jesuina, Provedor Adjuntu sira labele hala’o funsaun iha kualker kargu ka órgaun instituisional seluk, labele involve iha atividade polítiku ka partidu polítiku iha kualker kargu polítiku, no labele manan saláriu iha kualker organizasaun seluk, tanba kompetensia PDHJ nian prinsípal mak atu halo investigasaun, fiskalizasaun no rekomendasaun, inklui promosaun ba direitus humanus no governasaun di’ak.

Maibé Jesuina salienta, atu hala’o kna’ar hirak ne’e ho di’ak, presiza reforsa tan kooperasaun institusional ho Governu, entidades públikas, sosiedade sívil, setór privadu, reforsa komunikasaun internal no esternal, fó prioridade ba atividade ne’ebé foka ba vítima, halo diseminisaun atu hasa’e konsiensia públiku, halo monitorizasaun ba problema hirak ne’ebé mosu liga ho isu direitus humanus, no fó pareser opiniaun proposta no rekomendasaun, ho objetivu atu hadía no hasa’e, respeitu direitus humanus no governasaun di’ak.

Jesuina mós kompromete, atu halo monitorizasaun nafatin hodi garante boa governasaun iha Timór-Leste.

“Ba oin PDHJ sei haree nafatin isu sira ne’e no halo monitorizasaun urjente, nune’e bele fó proposta ka rekomendasaun ba entidades relevantes para atu hadía sira-nia polítika no servisu, nune’e ita bele presta sira-nia servisu di’ak liu ba ita-nia sidadaun sira. Ho prezensa adjuntu nain rua ne’e, ne’ebé iha koñesimentu ho ida-idak nia abilidade no ida-idak nia esperiensia iha ida-ida nia área, sei fó apoiu másimu ba provedor hodi implementa no alkansa metás no objetivu iha planu estratéjikus no planu asaun anual PDHJ nian, hodi promove direitus humanus no mós governasaun di’ak,” tenik Jesuina.

Provedora adjunta Venicia Iriana Magno sei toma konta asuntu direitus humanus no provedor adjuntu Miguel Pereira de Carvalho sei haree liu asuntu boa governasaun iha Timór-Leste.

Entretantu, hafoin provedora PDHJ Jesuina simu posse iha fulan Novembru tinan 2018.say


Banner

Foto

Notisia Ikus

PPN: Singapura rejeita TL adere ba ASEAN ne’e normál

August 5, 2021
Prezidenti Parlamentu Nasional (PPN) Aniceto Gut...

FRETILIN husu Governu hadi’ak implementasaun SB

August 5, 2021
Bankada FRETILIN, sujere Governu atu avalia impl...

Governu laiha kapasidade ezekuta OJE

August 5, 2021
Deputada bankada CNRT, Bendita Moniz Magno, kons...

Kevin Blackstone la kontente husik TL

August 5, 2021
Embaixadór Estadu Unidu Amérika (EUA), Kevin B...

Governu seidauk rekupera estragu sira husi DN

August 4, 2021
Parlamentu Nasionál (PN) kestiona, besik ona fu...
1 2 3 625

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker