Segundu Komandante Munisípiu Díli Polísia Nasionál Timor-Leste (PNTL), Superintendente Euclides Belo, informa, Komandu PNTL kumpre orden husi parte kompetente hodi sosializa regra Estadu Emerjénsia ba públiku, relasiona ho pandemia coronavirus (COVID-19) ne’ebé eziste ona iha Timor-Leste.
Euclides, afirma, bainhira sidadaun sira la kumpre regras ne’ebé iha, komandu PNTL sei foti medida ne’ebé rigorozu.
“Ami iha avizu ba ita-nia komersiante sira ne’ebé la’ós fa’an sasan primária, signifika katak, la’ós fa’an ai-han hanesan fos, mina, bee no selu-seluk tan, ida ne’e loke nafatin, maibé prense rekezitu sira ne’ebé mak Governu fó sai ona, tenke prepara bee fase liman ni’an, servidór sira ne’ebé servisu ne’e tenke uza maskara no luvas para bele fó asisténsia ba konsumidór sira no mós suspende loja sira ne’ebé fa’an sasan konstrusaun ni’an”, Segundu Komandante PNTL munisípiu Díli ne’e ba jornalista sira hafoin halo sosializasun iha Díli, Segunda (30-03-2020).
Entretantu tuir dadus mundiál ba loron 30, fulan Marsu ne’e, rejistu kazu pandemia COVID-19 hamutuk 735,138 no hamate ona ema 34,806 no ema ne’ebé rekopera ona husi pandemia COVID-19 hamutuk 156,137, maibé iha Timor-Leste foin konfirmadu sidadaun estranjeiru ida mak infetadu COVID-19. san
