Konfrontu entre joven sira husi Aldeia Has-Laran no Aldeia Sorumutuk rezulta ema nai’in lima kanek no uma ida rahun.
Problema ne’e akontese iha Sábadu (22/03/20) mais ou menus tuku 2 madrugada oras Timor-Leste, entre joven sira husi Aldeia Has-Laran, Suku Bemori, Postu Administrativu Nain-Feto no Aldeia Sorumutuk, Suku Kuluhun, Postu Administrativu Kristu-Rei, munisípiu Díli.
Tuir uma nai’n Joanina Ximenes, hateten, problema ne’e akontese wainhira nia iha uma-laran, derepente de’it nia uma hetan tuda husi uma oin no kotuk hodi rezulta vidru janela uma nian rahun inklui armari uma-laran rua no osan.
“Sira Aldeia Sorumutuk mai provoka tiha ona, mas ami la hatene, ha’u ho alin toba hela, toba ema provoka ami hader, depois ami nia ami nia maun sira mai husi Hera mai husi Mate uma mak tuun ba Aldeia Sorumutuk, tuun ba mós ami rona barullu ona, entaun ha’u fanu ha’u nia alin dehan ita rua ba haree took keta buat ruma karik, derepente ami nia uma tuda no tolok depois dehan ami milisi pendatang, ami senti labele ha’u alin bolu malu sai husi janela uma kotuk”,esplika uma nai’n Joanina Ximenes, ba GMN Domingu (22/03/20) iha Aldeia Has-Laran.
Joanina akrsenta, iha akontesimentu ne’e, osan mós lakon iha armari-laran.
“Osan sinku mil no motor ida rahun inklui telemovel ida lakon. Tanba ne’e ha’u hakarak prosesu kazu ne’e la’o ba oin no ha’u-nia uma ne’ebé mak rahun sira hadia fila-fali ho osan”,deha Joanina.
Sasin Maria Freitas husi Aldeia Sorumutuk haktuir, joven sira kuandu tempu Sábadu kalan sira sempre tuur hamutuk iha Torre oin hodi halimar PUBG, derepente de’it rona joven sira haksesuk malu.
“Entaun ha’u mós hader sai mai haree ba sira baku malu ona, entaun sira halai mai dehan tia ajuda lai haree lai ha’u nia ulun ran, entaun ha’u haree ran sulin ha’u nia liman ain nakdedar, la kleur sira kanek ne’e mai tan, entaun nusa problema saída mak sira mai asaltu tiha ona ami nia labarik sira ne’e, ne’e mak ema halai liu tiha depois mak ami nia labarik sira ba seran sira nia uma. Joven sira Aldeia Has-Laran la mai baku karik ami-nia labarik sira la baku hasoru sira”,dehan Maria Freitas.
Kona-bá osan rihun lima ne’ebé mak nai’n husi Joanina Ximenes lakon ne’e, Maria Freitas dehan, nia parte la hatene.
“Ami la hatene kalan tanba hotu-hotu ba ita la hatene sé mak atu foti-sé mak atu foti ami la hatene”,dehan Maria Freitas.
Alende ne’e, Luis Alexadre Tilman da Silva, hateten, kazu ne’e akontese wainhira nia ho kolega sira halimar hela PUBG, derepente de’it hetan asaltu husi joven sira Aldeia Has-Laran.
Joven sira ne’ebé mak kanek mak hanesan José Gomes hetan ta’a iha parte liman no Claudio Fatíma Vidigal parte ulun, Pedro Nilton Paulo Soares, parte ulun no joven ida tan.
Pedro Nilton Paulo Soares, haktuir, iha akontesimentu ne’e nia haree joven sira husi Aldeia mai ho sasan kro’at de’it.
Iha fatin hanesan Lucia dos Santos, abitante husi Aldeia Sorumutuk, hateten, nia oan mane José Gomes hetan kanek iha parte liman tanba ta’a.
“Ami-nia oan tuur iha sira-nia uma hodi halimar PUBG, nia mak ho kareta lori bola guling haruka hatun nia feton mak hodi sadik ha’u nia oan uluk, depois nia lori tudik sona dala rua sorte tudik la tama, sé lae ha’u nia oan mak mate uluk. Ne’ebé ha’u prontu ba tribunal”,dehan Lucia dos Santos Gomes.
Iha akontesimentu ne’e mós Polísia Eskuadra Nain-Feto too iha fatin akontesimentu hodi rekolla informasaun husi komunidade sira ne’ebé mak involve iha problema ne’e.avi
