Postu Unidade Polísia Marítima (UPM) iha Mota-Masin munisípiu Covalima ho kondisaun grave, tanba wainhira udan monu rai membru sira labele tuur iha laran no labele toba.
Alende ne’e Postu UPM ne’e mós iha ró lansa ida, maibé avária ona, tanba burasia koak.
Komandante Postu Unidade Marítima Mota Masin hateten, hahú iha tinan 2014 estabelese, komando PNTL koloka uma kontentor rua no ro lansa ida, maibé dadauk ne’e, uma kontentór rua ne’e kuak, be udan ben sulin tama sala seguransa no toba fatin sira hodi fó impaktu ba membru sira nia deskansa waihira iha tempu kalan.
Tanba ne’e membru UPM ho komunidade halo uma tali tahan rua hodi garante seguransa no deskansa kalan nian.
Komandante UPM Postu Mota-Masin ne’e dehan, maske ho difikuldade hirak ne’e membru sira nafatin fuan boot hodi garante seguransa ba rai ida, liu-liu kontrola movimentu peska ilegal labele tama mai iha tritóriu Timor-Leste, liu husi fronteira tasi entre Indonézia ho Timor-Leste.
“Ita boot sira mós haree iha fatin hira iha ne’e ami labele utuliza, tanba iha tempu udan ami labele deskansa, no kontainer rua ami foti husi batas kondisaun ladun diak, tanba be’e sulin hela de’it. Ne’ebé ami UPM ho autoridade lokal sira iha iha Mota-Masin harii barak ida ne’e hodi toba, wainhira akontese udan boot”,esplika Komandante Postu Unidade Marítima Mota Masin Primeiru Sarjentu Baltazar Nunes Almeida, ba GMN Sesta (13/03/20), iha Mota-Masin.
Nune’e mós komunidade ho membru UPM sira, konstrui postu temporariu ida iha Mota-Masin hodi hela.
Kona-bá ró lansa ne’ebé mak avária, komandante UPM Postu Mota-Masin dehan, durante ró lansa ne’e avária sira husu apoiu peskadór Salele balun apoiu ro ai hodi halo operasaun, maibé UPM fasilita konbustivél.
Alende ne’e Komandante Unidade Polísia Marítima Superintendente Assistente Basílio de Jesus,konsidera postu ne’e grave tebes tanba ne’e, presiza tau atensaun hodi harii postu temporariu ida hodi membru sira bele hela.
No ro lansa ne’ebé mak avaria, Komandante UPM haruka transporta husi Postu Mota-Masin mai Díli hodi halo manutensaun
“Maske kondisaun ne’ebé mak grave tebes ha’u hanesan Komandante hanesan Timor oan, ha’u hanoin prinsipiu nafatin no korajen nafatin ha’u nia membru sira, mesmu infrenta difikuldade sira hanesan ne’e ida ne’e labele konsidera hanesan obstaklu hodi halo ita nia funsaun, hanesan Timor Polísia Timor oan akontese hanesan nasaun foun hanesan Timor-Leste, mas ha’u dehan ida ne’e labele sai falia obstaklu membrus PNTL liu-liu UPM atu hala’o nia funsaun iha parte ne’e mai”,dehan Basílio de Jesus.
Total membru UPM ne’ebé mak hala’o kna’ar iha Mota-Masin, hamutuk nai’n sia ho kareta operasionál ida, maibé dadauk ne’e hahú avária no halo hela manutensaun.avi
