Komandante jerál Polísia Nasionál Timor-Leste (PNTL) Komisáriu Faustino da Costa esplika, fatin karantina ba estudante no mos sira seluk hetan tuda iha Díli, tanba komunidade balun falta informasaun.
Faustino da Costa dehan akontesimentu tuda fatin sira ne’e tanba estudante Timor oan sira hafoin fila husi estranzeiru, governu desidi haruka sira hela iha Karantina iha Hotel Audian maibé hetan tuda husi ema balun.
“Iha fatin sira hotu PNTL asegura, akontesimentu sira tuda tanba falta de’it informasaun ne’ebé la kompletu, entaun ita esplika tiha ona fatin rua komesa horoseik, deste loron Sabádu komunidade apar no komprende, so que iha parte Bimori nian no Audian nian mak iha ema ida rua tenta book boot ne’e, mas líder komunitária sira esplika ona ne’ebé situasaun laiha problema”, esplika Komadante Jerál PNTL Komisáriu Faustino da Costa, ba jornalista sira Segunda (23/03/20) iha Kuartel Jerál PNTL, Caicoli, Díli.
Atu prevene vírs COVID-19 tama Timor-Leste, Faustino da Costa husu autoridade lokal sira atu koopera, wainhira hetan Timor oan ruma fila husi estranzeiru husu atu informa ba Polísia.
“Husu komunidade tomak koopera informa karik balun foin fila husi rai liu, liu-liu iha seman nia laran husi nasaun afetadu sira ne’ebé mak ita nia governu hasai ona rezulusaun governu informa ba Polísia atu nune’e ekipa ba foti sira tau iha fatin ne’ebé governu indika hodi koloka sira ba”,dehan Faustino da Costa.
Alende ne’e PNTL PNTL koloka iha fatin karantina sira mak iha Hotel Novo Horijonte, Hotel Audian, Formosa no Tibar munisípiu Liquisa.avi
