Deputada bankada CNRT, Fernanda Lay, haktuir, Seguransa Guradamor 31 hato’o keixa ba bankada CNRT, tanba hetan despedimentu ka hapara servisu hosi Ministériu Negósiu Estranjeiru no Kooperasaun (MNEK).
Deputada opozisaun ne’e haktuir, traballadór hirak ne’e, maioria servisu ho durasaun tempu ne’ebé naruk, nune’e presiza iha justifikasaun antes hapara.
“Iha despedimentu hosi Guardamor nia ema 31, sira fó hatene, dehan Jorge Trindade, ha’u konfirma ona ho nia katak loos duni, sira hasai duni tanba kestaun orsamentu. Ha’u husu ba nia, se laiha orsamentu, liga ho ko’a 7% ne’ebé Governu atu hasai ne’e mak despede ema sira ne’e? nia dehan loos, alénde 7% ne’e, atu ko’a tan 20% ne’e mak fó impaktu ba despedimentu ema sira ne’e nian. Maibe despedimentu tanba razaun prosesu dixiplinar ruma la’ós 31 hasai hotu, se sira hasai 31 ne’ebé servisu iha ne’ebá durante tinan 13, para atu rekruta ema foun, ne’ebé hanesan ha’u konfirma ho seguransa sivíl, seguransa sivíl dehan iha ema, maibe problema mak, se hanesan ne’e, Governu rekruta ema la tuir nesesidade, rekruta barak liu, depois despede ema seluk. Governu hakarak hapara hotu instituisoens seguransa nian, hanesan Guardamor, Security Maubere no seluk tan ka halonusa? tenke klaru, tanba ida ne’e fó impaktu ba ema nia moris, sira mós iha família, hau la’os hatete dehan labele halo despedimentu, maibe iha regras, se iha prosesu dixiplinar ne’e muito bem, maibe hasai sira 31 ne’e hasai hotu, para rekruta ema foun ne’e justu ka la’e? Liu-liu iha situasaun COVID hanesan agora ema hotu hakilar tanba laiha ai-han, depois sira ne’e lakon tan paun fuan ida iha sira-nia liman. Klaru katak ami hatene rekrutamentu balun foin halo, sira lori sira nia dokumentu foin ba rejistu iha Sr. Jorge Trindade Neves Camões, maibe sira la simu ha’u-nia kontaktu, ha’u dehan ha’u Fernanda Lay hosi PN mak foin sira esplika katak tanba orsamentu ko’a ne’e”,esplika deputada Fernanda ba jornalista iha PN, Tersa (16/03/2021).
Kompañia Guardamor hapara nia seguransa 31 ne’ebé destaka iha MNEK, tanba Governu hapara kontratu ho kompañia refere, inklui kompañia ne’e rasik laiha orsamentu atu finansia pesoál hirak ne’e.
Traballadór sira ne’e, simu karta notifikasaun dezde fulan Fevereiru, katak hahú hosi loron 17, fulan Marsu, traballadór sira ne’e labele kontinua servisu tan.Say
