Komandante Polísia Nasionál Timor-Leste (PNTL) munisípiu Díli Superintendente Xefe Henrique da Costa, autoriza komunidade bele pasa sasán ba malu iha fronteira husi Díli ba munisípiu seluk.
Maibé ba kompradór sira husi munisípiu atu mai sosa sasán iha kapitál Díli presiza iha Guia de Marcha husi Sentru Integradu Jestaun Krize inklui ba komunidade sira ne’ebé mak atu tama sai iha fronteira Díli ba munisípiu sira seluk.
“Primeiru ema tama sai tenke iha guai de marcha, maibé ema sira pasa kareta ba malu laiha buat ida, so ema mak ita hapara ou sira iha kareta atu sosa sasán ruma iha Díli atu ba Aileu, sira bele hasai sasán husi kareta ida ba pasa fali iha kareta seluk ne’e livre”,esplika Komandante Polísia Nasionál Timor-Leste (PNTL) munisípiu Díli Superintendente Xefe Henrique da Costa, ba jornalista sira Kuarta (17/03/2021), iha Ministériu Negósiu Estránjeiru Kooperasaun Praia dos Coqueiros, Díli.
Governu aplika, serka sanitária iha kapitál Díli hahú iha Tersa (09/03/2021) no remata iha Segunda (15/03/2021), maibé haree husi loron ba loron, ekipa Ministériu Saúde rejista kazu pozitivu aumenta. Tanba ne’e iha Tersa (16/03/2021) Governu liu husi Konsellu Ministru estende serka sanitária iha kapitál Díli to’o loron rua fulan Abril tinan ne’e. Serka sanitária ne’ebé Governu aplika ba mós Munisípiu Baucau no Viqueque.avi
