FOTO: GOOGLE
Liu husi reuniaun Konsellu Ministru (KM), Governu aprova projetu rezolusaun, hodi nomeia superintendente PNTL, Ismael da Costa Babo, atu asume karrgu Prezidente Autoridade Protesaun Sivíl (PAPS) ho durasaun tinan 4.
Iha reuniaun ne’e, Sekretáriu Estadu Protesun Sivíl (SEPS), Joaquim dos Reis Martins, propoin kandidatu rua, ba Konsellu Ministru hanesan kandidatu Ismael da Costa Babo, no Osório Bianco.
Hafoin halo análiza, Konsellu Ministru deside nomeia Ismael da Costa Babo, ba pozisaun refere.
“Autoridade Protesaun Sivíl mak entidade ezekutiva, iha ambitu nasionál ne’ebé regula atividade sira protesaun sivil nian, no ninia prezidente atua hanesan pontu fokal ba ligasaun ho nivél polítika no sei halo jestaun operasional administrative lojistika no finanseira ba sistema protesaun sívil tomak”. hateten Ministru Finansa, Rui Augusto Gomes, hafoin reuniaun KM, iha Palásiu Governu Díli, Kuarta (30/3/2022).
Iha reuniaun Konsellu Ministru ne’e, aprova mós projetu dekretu lei, ne’ebé aprezenta husi Ministru Administrasaun Estatál (MAE), Miguel Pereira de Carvalho, konaba Fundu Espesiál Ba Dezenvolvimentu Atauro (FEDA).
Fundu Espesiál Ba Dezenvolvimentu Atauro, ho montante millaun USD 13, ne’ebé atu finansia programa no projetu sira, ho karakter sósiu ekonómiku no ambientalmente sustentável, destina ba dezenvolvimentu territóriu, no populasaun iha Munisípiu Atauro. Ags
