Atividade kampaña eleitoral ba eleisaun antesipada, ohin Tersa (10/04/18) hahú. Tanba ne´e, Polísia Nasionál Timor-Leste (PNTL) ho FALINTIL Forsa Defeza Timor-Leste (F-FDTL), prontu fó seguransa máximu ba realizasaun atividade refere iha munisípiu 12 inklui Rejiaun Administrativa Espesial Oecusse Ambeno (RAEOA).
Lia hirak ne´e hato’o husi komandante Jeral Polísia Nasionál Timor-Leste (PNTL), Komisariu Julio Hornay no Xefe Estadu-Maiór Forsas Armadas, Majór Jenerál Lere Anan Timur liu husi enkontru konjunta entre institusaun defeza no seguransa iha Kuartel Jeral F-FDTL Fatuhada Díli, Segunda (09/04/18).
``Enkontru ida ne´e ita hala’o atu Komando rua PNTL ho F-FDTL fó briefing jeral ba ita hotu nia preparasaun ba seguransa eleisaun antesipada. Tamba ne´e marka prezensa komandante unidade, komandante komponente, komandate munisípiu servisu ne´ebé mak toma responsabilidade iha terenu,`` esplika komandante Jeral Polísia Nasionál Timor-Leste (PNTL), Komisariu Julio Hornay.
Tuir Julio Hornay , eleisaun antesipada primeira vez akontese iha nasaun ne´e, depois Timor-Leste ukun a´an tinan sanulu resin ona.
``Aban loron sanulu komesa ona kampaña, ha´u hanoin ba PNTL klaru ona, kada munisípiu ita iha ona, ita sei apoiu Komando munisípiu karik nesesita Komando atu apoiu atu reforsa tan iha terenu,``dehan Julio Hornay.
Tanba ne´e mak, Julio Hornay, husu atu membru sira presiza servisu maka’as iha terenu hodi antesipa karik militante balun aproveita situasaun hodi kria konflitu iha ámbitu antes de kampaña eleitoral no eleisaun to´o kontajen hodi anunsiu rezultadu to´o formasaun oitavu Governu Konstituisional.
Nia afirma, sa seguransa kampaña eleitoral ida ne´e sei halo seguransa em koordenada entre PNTL ho F-FDTL. Tanba ne´e mak Komando rua iha responsabilidade atu fó hanoin nafatin ba ofisiais sira no superior sira ne´ebé mak kaer komando operasaun iha terenu atu bele asegura diretiva operasaun ne´ebé mak komando hasai ona, planu operasaun feitu entre komando operasaun ne´ebé mak halo hamutuk ho komando PNTL.
“Husu ba Komandante sira iha terenu atu koopera nafatin iha prosesu operasaun nia laran nune´e forsa rua bele hamutuk hodi fó seguransa ne´ebé mak diak eleisaun antesipada,”dehan Julio Hornay.
Julio Hornay mos husu ba militante ne´ebé mak sei partisipa iha kampaña eleitoral atu labele viola regras tránzitu, wainnira kondus motorizada la uza kapaseti no kanuracing Polísia sei halo prevensaun.
``Iha programa check point iha fatin-fatin sei rigorozu hodi ita bele detekta no identifika karik iha sasan kroat ema uza ka militante uza iha prosesu kampaña nia laran ita ténki prevene.Tamba ne´e mak husu ba Komando PNTL munisípiu 13 atu implementa ho apoiu ita-nia forsa ne´ebé mak kolokadu iha munisípiu balun, koordena malu nafatin, halo patrulhamentu lao ain ka ho kareta iha fatin risku ne´ebe mak iha,``dehan Julio Hornay.
Alende ne´e, Xefe Estadu-Maiór Forsas Armadas, Majór Jenerál Lere Anan Timur hateten, nudar Timor oan ema hotu-hotu hakarak estabilidade, tanba ne´e instituisaun rua ne´e ténki servisu hamutuk hodi garante seguransa atividade kampaña eleitoral no eleisaun antesipada.
``Ita instituisaun rua ne´e atu haree no tau matan se mak los, se mak sala. Ita ne´e arbitu la´os ba joga hotu, la´os atu ba sosa, la´os atu ba fan, o sosa ne´e diak ka lae? hatun folin ka lae? o fan modo diak ka lae? o fan modo a´at ka lae? ita ba interven ida ne´e,``dehan Lere Anan Timur.avi
