Advogadu privadu JNJ husi arguidu AAP, Januario Martins informa, ninia parte aseita ho medida koasaun Termu Identifikasaun Rezidensia (TIR) no proibisaun auzensia ne’ebé Tribunal Distrital Díli (TDD) aplika ba ninia kliente, tanba material prima kilograma 250 ne’e la’os arguidu maka ba foti iha aeroportu no iha audénsia hatudu katak, material prima ne’e iha kilograma 250, maibé lakon tiha kilograma 50, ho nune’e iha de’it kilograma 200.
Januario Martins hato’o asuntu ne’e relasiona ho preokupasun públiku nian, tanba la aseita ho medida koasaun ne’ebé TDD aplika.
“Momentu iha audénsia ba primeiru interogatóriu ne’e hatudu katak, materia prima hirak ne’e lakon tiha ona kilograma 50 no tuir BQ katak, materia prima ne’e kilograma 250, maibé kuandu menus ami deskonfia buat ruma laloos, tanba wainhira material prima ne’e to’o iha aeroportu la’os arguidu maka ba foti, maibé servisu sekretu ou polísia intelijenti sira maka ba foti no tula iha kareta ida hodi entrega fali ba arguidu iha Aitarak- Laran ne’e para ikus mai dehan fali arguidu ne’e fragante de leitu, ba hahalok ne’ebé la’os arguidu maka halo, maski material prima ne’e ema haruka duni ba arguidu, maibé ema seluk maka ba foti sein rekoñesimentu husi arguidu, tanba ne’e atu dehan de’it katak, arguidu la’os fragante de leitu no parese, tanba ne’e maka TDD la aplika prizaun preventiva ba arguidu,” Advogadu privadu JNJ husi arguidu AAP ne’e ba GMN iha ninia kna’ar fatin, Timor Plaza-Díli, Segunda (29-04-2019).
Nia esplika, arguidu rasik hanesan emprezariu no material prima hirak ne’e seidauk bele hateten, droga, tanba seidauk iha prova no material prima hirak ne’e atu produz no uza iha parte saúde nian.
“Antes ne’e ami nia kliente servisu hamutuk ho ema Indonesia ida, hodi fasilita importasaun husi Cina ba Indonesia liu husi Timor, tanba liu husi Timor tasa ki’ik 5 %, tanba ne’e arguidu mós servisu hamutuk ho ema ne’e, tanba arguidu mós hetan lukru husi negósiu ne’e, maibé antes ne’e arguidu mós hatama ona pedidu ba Ministériu Saude (MS) husu autorizasaun hatama materia prime ne’e, maibé MS seidauk bele autoriza, tanba ne’e wainhira material prima ne’e tama la’os arguidu maka ba foti, maibé intelijenti sira maka ba foti, maski material prima ne’e haruka ba arguidu, maibé arguidu rasik laiha intensaun atu prezudika povu liu husi ai-moruk ne’e,”relata Januario.
Advogadu ne’e mós hatutan, dau-daun ne’e arguidu hela ho nia oan sira iha Díli, hodi hein prosesu investigasaun remata.
“Imposivel arguidu ba estranjeiru, tanba dokumentu hanesan pasaporte agora dau-daun iha TDD no dau-daun ne’e arguidu hela ho nia oan sira no hela iha rezidensia ne’ebé fó ba polísia no TDD,”dehan Januario Martins.
Husi sorin seluk, fén husi arguidu AAP ne’ebé lakohi fo nia naran konfirma, arguidu dau-daun ne’e iha Díli, hela hamutuk ho ninia oan feto no la sai ba rai liur.
Fén husi arguidu ne’e espera katak, prosesu ba kazu ne’e sei la’o tuir regra ne’ebé iha, hodi hein investigasaun remata. ita
