Komandante Jerál Polísia Nasionál Timor-Leste (PNTL), Komisariu Faustino da Costa hateten, sidadaun Domingos Lopes ho naran istimadu “Muhamad” la’os membru PNTL, ne’ebé mak servisu nu’udar cleaner.
“Atu dehan de’it katak, ema ne’e kontratadu la’os PNTL, depois tuku lima liu ha’u fila husi Komando PNTL Munisípiu Díli, ha’u orienta ba Xefe Gabinete PNTL submete ba prosesu, depois rekomendasaun demetidu”,esplika Komandante Jerál PNTL Komisariu Faustino da Costa, ba jornalista sira Sesta (12/04/19), iha Kuartel Unidade Espesial Polísia Bairu-Pite Díli.
Faustino da Costa akresenta, hanesan Komandante Jerál PNTL, la halimar ho asuntu falsifikasaun no informasaun falsa.
Alende ne’e Komandante Unidade Espesial Polísia Superintendente Xefe Afonso do Santos hateten, sidadaun Domingos Lopes, servisu cleaner kontratadu, ne’ebé mak rekruta pasadu husi Komando Jerál PNTL, ne’ebé mak destaka iha Batallaun Orden Públika Maliana.
“Ema ne’e iha kartaun identidade eleitoral nia tuir ona eleisaun dala rua iha Timor-Leste, maibe ema ne’e iha fali kartu Tanda Penduduk (KTP) Indonezia nian, ha’u hanoin ténki prosesu investigasaun Komandante Jerál demiti ona nia husi servisu”,dehan Afonso do Santos.
Entretantu Domingos Lopes “Muhamad” iha kartaun husi nasaun rua, hanesan Kartaun eleitoral no billete identidade, no kartaun Indonezia KTP.
Alende ne’e, sidadaun ne’e mós iha kartaun ho marka Sekretaria Estadu Seguransa (SES) PNTL.avi
