GMN TV Justica e Segurança Deskonfia pesoál PNTL lori kilat ameasa Naimori, PN kondena ■MDI: Polísia investiga hela

Deskonfia pesoál PNTL lori kilat ameasa Naimori, PN kondena ■MDI: Polísia investiga hela

0 views

Deskonfia pesoál Polísia Nasional Timor-Leste (PNTL) balun deskonfia lori kilat ameasa konselleiru másimu partidu Kmanek Haburas Unidade Nasionál Timor-Oan (KHUNTO) José dos Santos Naimori Bucar iha nia rezidensia Manleuana. Tanba ne’e, bankada sira iha Parlamentu Nasionál (PN) kondena no husu Governu no Polísia Nasionál Timor-Leste (PNTL) atu halo investigasaun kle’an.

Vise xefe bankada FRETILIN, deputadu Francisco Miranda Branco, hateten, aktu husi pesoal refere, hakanek prinsipiu konstitusisonal, estadu direitu demokrátiku, tanba ne’e, presiza halo investigasaun ho kle’an.

“Ami repudia total ba aktus bandalizmu iha prátika polítika iha ita-nia rain ne’ebé ita hotu hadomi, aktus ne’ebé hakanek ita nia prinsipiu konstitusional, hakanek ita nia demokrasia, hakanek ita nia estadu direitu no hakanek ita nia liberdade.

Ami refere ba aktus ne’ebé hala’o iha semana kotuk, hasoru Sr. Naimori, líder partidu polítiku ida, ne’ebé iha mós reprezentasaun iha uma fukun ida ne’e, uma povu nian, no uma demokrasia nian, ami hein prosesu investigasaun, tenke buka tuir autór sira ne’ebé uza forsa no kilat povu nian, hodi buka hamate liberdade no hamate demokrasia iha ita nia rai doben ida ne’e,”kestiona Branco iha plenária Segunda (27/04/2020).

Alende ne’e, xefe bankada CNRT, deputadu Duarte Nunes sujere atu halo andamentu ba kazu ida ne’e, tanba ligadu ho dignidade pesoál ne’ebé akuzadu inklui partidu rasik.

“Bainhira ami-nia kompañeiru ida ne’ebé mak hetan akuzasaun, husi deputadu ida, iha momentu ne’ebá kedas, maske momentu ne’ebá hau la partisipa iha reuniaun ne’e, tanba hau iha reuniaun seluk, maibe iha ne’ebá kedas husu atu investiga. Komandante PNTL mós iha ne’e karik rejista, halo favor halo andamentu ba ida ne’e, no ita hakarak transparansia toda as vezes iha prosesu ida, favor informa ba plenária, tanba ne’e naran di’ak ba ami nia kompañeiru no ba partidu. Ami prontu atu submete, fi’ar katak buat sira ne’e tenke iha nia rohan, ne’e kleur ona. Uluk dehan maun Xanana mak ba iha ne’ebá atu ka’er Naimori, agora ikus fali dehan kompañeru Rigoberto mak atu ba, tanba nia hanesan sekretáriu jerál interinu, tanba sekretáriu jerál laiha,  agora dehan nia mak atu ba kaer Naimori. Ha’u haree katak ne’e prosesu ida ne’ebé públiku ona, tanba ne’e espera katak tenke la’o duni nia prosesu, no husu para polítiku sira labele interven iha prosesu nia laran.”haktuir xefe bankada ne’e.

Alende ne’e, deputadu Partidu KHUNTO, Luis Roberto da Silva, haktuir, informasaun refere nia parte hato’o ona iha reuniaun líder bankada, tanba iha oknum balun ne’ebé atu polítiza situasaun Estadu Emerjénsia ne’e.

“Iha Sesta-feira bainhira hala’o enkontru líder bankada, reprezentante husi governu mós iha, Ministru Fidelis rasik, no iha mós prezensa kada bankada nian. Ha’u hato’o  ona iha ne’ebá katak iha oknum balun ne’ebé aproveita Estadu Emerjénsia ne’e, hodi polítiza fila fali buat ne’ebé mak lakohi ita atu akontese iha Timor ida ne’e, no fiar katak iha ona governu nia liman para bele prosesa,”informa Vise prezidente PN ne’e.

Aktu ne’e deskonfia akontese iha Semana kotuk, iha rezidensia konselleru másimu partidu KHUNTO, José dos Santo Naimori Bukar, iha Manleuana Díli.

Maske nune’e, tuir informasaun ne’ebé GMN asesu via telemovel bainhira halo kontaktu ho seguransa fundadór partidu KHUNTO ne’e, informa katak, durante ne’e laiha ema ruma mak halo ameasa ba Naimori, tanba ne’e nia konsidera informasaun ne’ebé espalla iha públiku ne’e lalos.

MDI: Polísia investiga hela

Hatán ba kestaun ne’e, Ministru Defeza no Interiór Interinu (MDI), Filomeno Paixão, hatete, nia  koalia ona ho Komandante Jerál PNTL Komisáriu Faustino da Costa, no oras ne’e investiga hela dadauk ona ba aktu krime ne’e.

“Kazu ne’e akontese semana kotuk, komandante fó hatene ha’u, ami investiga hela ona, imi hein de’it pasiensia oituan, depois  iha ona rezultadu mak ha’u fó hatene ba imi”,esplika Ministru Defeza no Interiór Filomeno Paixão, ba jornalista sira Segunda (27/04/20) iha Parlamentu Nasionál

Governante ne’e akresenta, to’o agora laiha kilat ruma mak  menus iha instuisaun PNTL no FALINTIL Forsa Defeza Timor Leste (F-FDTL).

“Uluk jenerál Lere dehan kilat ilegal tama hanoin kona ka lae,   ita bele hanoin kilat ilegal, it abele hanoin PNTL bele F-FDTL investiga lai mak ita  haree”,dehan Filomeno Paixão.

To’o notísia ne’e publika, GMN seidauk hetan konfirmasaun husi parte PNTL kona-bá progresu investigasaun ba kazu  krime ne’e.say/avi


Banner

Foto

Notisia Ikus

SEFOPE compromete-se a aplicar sanções a traballadóres ilegais na Austrália e Coreia do Sul

June 25, 2022
O Diretór Nacional do Emprego no Exterior (DNEE...

MOP compromete-se a requalificar autoestrada de Covalima

June 25, 2022
O Ministério das Obras Públicas (MOP) comprome...

PR Ramos Horta sei halakon LPV iha tinan 2023

June 24, 2022
Prezidente Repúblika (PR), José Ramos Horta, h...

To’o agora deputadu barak la hatene ko’alia Portugés

June 23, 2022
Maske Timor-Leste ukun-an tinan 20 ona, maibé p...
1 2 3 739

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker