Polísia Nasionál Timor-Leste (PNTL) munisípiu Díli prende sasán kro’at no binókulo kilat manu husi komunidade sira ne’ebé mak halo movimentu ho kareta no motorizada.
Aktividade pasa revista ne’e hala’o Domingu (26/04/20) iha Fatu-Ahi, Postu Administrátivu Cristo-Rei, munisípiu Díli, konsege prende sasán kro’at sira ne’ebé mak lori husi komunidade ne’ebé mak hala’o movimentu ho kareta no motorizada.
Sasán kro’at sira ne’e mak hanesan tudik katana no binókulo kilat manu nian.
Wainhira prende tiha sasán sira ne’e PNTL lori kedas ba eskuadra Cristo-Rei hodi submete ba prosesu investigasaun.
Segundu Komandante PNTL munisípiu Díli Superintendente Euclides Belo esplika, operasaun ne’ebé mak PNTL munisípiu Díli hala’o hodi komprementa alerta um ne’ebé mak komando tomak aplika.
“Hanesan imi hare’e PNTL sira halo pasa revista hodi eduka ita nia sidadaun sira atu kumpri nafatin ordem konteude husi Estadu Emerjénsia ne’e, liu-liu sidadaun sira tenku uza máskra fase liman, kontrola distánsia sosial. Tanba ne’e mak iha alerta um prezensa Polísia iha dalan públiku iha loja, iha bairu sira ne’e para eduka ita nia komunidade sira. Tanba ne’e mak check point ida ne’e pas parte husi alerta um ne’ebé mak komando ezekuta hodi halo pasa revista ba transporte sira, tantu kareta no motorijada.Alende ne’e lei númeru 5/2017 fó dalan mai ami ligadu ba arma branka. Ne’ebé iha pasa revista ne’e prefere liu ba sidadaun sira ne’ebé mak lori sasán kro’at. Tanba ne’e mak sidadaun ne’ebé mak halo movimentu tama capital Díli lori sasána kro’at bandu lori sasán kro’at, katana inklui mós kilat manu”,esplika Segundu Komandante PNTL munisípiu Díli Superintendente Euclides Belo, ba GMN Domingu (26/04/20) iha Fatu-Ahi Díli.
Nune’e mós membru PNTL Eskuadra Cristo-Rei harii tenda temporariu ida iha Fatu-Ahi, hodi bele deskansa wainhira udan no loron manas.avi
