Membru Polísia Nasionál Timor-Leste (PNTL), hala’o movimentasaun maka’as hodi limita sirkulasaun komunidade nian no bandu ema na’in rua sa’e motorizada ida.
Iha Tersa (31/03//20) PNTL ezekuta dekretu lei númeru 3/2020 hodi kontrola serkulasaun motorizada labele tula ema na’in rua no kareta sira.
Komandante Operasionál PNTL Superintendente Xefe Pedro Belo,husu komunidade ne’ebé mak kondus motorizada no iha kareta tenki uza mascara, wainhira la kumpri Polísia sei foti medida.
“Ohin ami hala’o inspesaun ba ami-nia ekipa ne’ebé mak fahe ona ba Díli-laran hamutuk hitu para ezekuta dekretu governu 3/2020. Tanba ne’e mak ohin sira komesa halo implementasaun ona. Implementasaun ne’e ami halo ba fatin rua, ema sira ne’ebé mak tula ema na’in rua, ami fó opsaun ba sira. Tanba ne’e faze ida foin hahú, entaun ami halo ba motorista sira katak, ida ne’ebé mak volontáriu hakarak tuun la’o de’it, entaun ami haruka kontinua la’o, maibé ida ne’ebé mak hakarak kontra fali ami nia pesoal iha terenu, sira tenki hetan tilan”,esplika Komandante operasionál PNTL, Superintendente Xefe Pedro Belo, ba jornalista sira Tersa (31/03/20), iha resintu Kuartel Jerál PNTL Díli.
Tanba ne’e mak membru PNTL sira koloka iha terenu hodi implementa regra ida ne’e ho didiak ba komunidade atu kumpri.
Atu nune’e ita hotu bele la’o ho susesu ita hotu mós halo prevensaun ba moras COVID-19, hodi labele hadaet ba ema seluk”,dehan Pedro Belo.
Entertantu PNTL ne’ebé mak koloka iha terenu kompostu husi Unidade Espesiál Polísia, Unidade Polísia Marítima, inklui Unidade Patrullamentu Fronteira.avi
