Prezidente Repúblika eleitu, José Ramos Horta, deklara, preokupadu ho ema balu kria violénsia hodi sunu militante CNRT ninia uma iha Oé-Cusse.
“Iha Oé-Cusse ema sunu elementu CNRT ida nia uma, iha Uatulari, primeira ronde iha Baucau tanba violensia husi KHUNTO, PLP. Husi kandidatura ha’u nian ne’e partidu polítiku sira barak no mos movimentu barak tebes laiha rejistu polisiál, komportamentu di’ak teb-tebes,” dehan José Ramos Horta, iha Díli, Kuarta (20/4/2022).
Horta hato’o agaradesimentu ba povu Timor-Leste tomak ne’ebé mak fó ona nia votu iha Eleisaun Prezidensiál segunda volta ne’e, maske hasoru difikuldade no dezafiu barak.
Premiadu Nobel da Paz José Ramos Horta mos agradese ba instituisaun seguransa nian hanesan PNTL, F-FDTL nian halo servisu di’ak para garante estabilidade iha eleisaun ne’e, em termos de violensia, ameasa barak ne’ebé iha.
“Felisita PNTL, F-FDTL, funsionáriu sira hotu iha STAE, CNE, mais que dalaruma ita haree situasaun balu akontese hanesan horiseik (Horibairuak) polísia na’in rua mak obriga konta fila-fali (surat) votasaun, ne’e viola kompletamente abuzu poder. Mas ne’e komando PNTL, ou F-FDTL halo patrulla barak. maibe iha instituisaun balu sivíl la podia lori kilat, maibe lori fali kilat, ne’e mos presiza investiga,” deklara Ramos Horta.
Nune’e mos Ramos Horta agradese ba maluk sira iha baze, ne’ebé fulan hirak ne’e nia laran halo servisu maka’as door to door hodi bele lori nia ba PR, tanba sira fiar.
PNTL seidauk identifika suspeitu
Ema deskoñesidu sunu uma militante CNRT ida nian iha Postu Administrativu Nítibe, Rejiaun Administrátiva Espesiál Oecussi Ambeno (RAEOA), iha Tersa (19/04/2022) kalan ne’e, husi parte Polísia Nasional Timor-Leste (PNTL) seidauk identifika suspeitu ruma hodi kaptura.
“Iha Oé-Cusse nian kazu ida akontese iha Nítibe ne’ebé mak oras ne’e iha prosesu investigasaun orsida finalidade husi investigasaun ida ne’e mak ita bele hatene tanba komunidade nia uma ida ne’ebé dook husi asesu públiku, entaun derepente ahi han no presiza investigasaun klean ida para ita hatene motivu ida ne’e insendu ka tentativa ligadu ho ita-nia prosesu eleisaun,” esplika Porta-Voz PNTL Superintendente Xefe Armando Monteiro.
Maske akontese kazu refere, maibé Porta-Voz ne’e hateten situasaun iha RAEOA, la’o kontroladu.avi
