Komunidade sira rejeita muda sai husi área Seroja-Comoro bainhira Governu la prepara rai ba sira hodi hela.
Ekipa tékniku husi Sekretáriu Estadu Terras no propriedade (SETP), akompaña husi tékniku Ministériu Óbra Públika (MOP) atu halo identifikasaun ba rai iha área Seroja, suku Comoro, postu administrativu Dom Aleixo, munisípiu Díli, ne’ebé konsidera partense ba rai Estadu.
Tanba tuir planu, Governu atu harii fali eskola koléjiu São Miguel Arcanjo, ne’ebé afeta husi konstrusaun estrada husi Tasi-Tolu, to’o rotunda Nicolau Lobato.
Maibé komunidade uma-kain atus ida resin iha seroja, la aseita prezensa ekipa tékniku husi Governu atu halo identifikasaun ba komunidade sira nia hela fatin no plantasaun.
Ho prezensa Ministru Óbra Públika, no vise ministru konsege fó hanoin balun, ba komunidade atu bele iha konsiénsia fó tempu ba ekipa tékniku sira hodi sukat rai.
Komunidade afetadu husu Governu, atu prepara rai ba sira, nune’e komunidade sira bele harii fali sira-nia uma.
‘’Armindo (Fundadór Eskola São Miguel Arcanjo) afeta husi Estrada ami afeta husi Armindo, ida ne’e mak ami la aseita. Armindo ema hotu-hotu ganti rugi sai hotu ona Armindo seidauk sai apakah Governu fó ona nia osan ganti rugi ka seidauk? Seidauk Governu presiza fó rai iha Timor ne’e rai laiha ona rai mak Seroja de’it ka rai seluk sei iha. Ami konsidera Armindo hela mós rai Governu, ami mós rai governu, tamba ne’e ami só hakruk ba desizaun Governu, ami kontra mak desizaun ida atu fó benefísiu ba Armindo,’’hatete komunidade afetadu, Sabino Ernesto, iha seroja, Díli, Sesta (01/04).
‘’Ezije ami para koopera ho Estadu, atu halo dezenvolvimentu maibe ita bo’ot sira la ezije ba São Miguel atu koopera ho Estadu, impedimentu alargamentu ne’e Armindo ne’e buka lukru ba nia bolu nia iha osan nusa la buka rai seluk,’’ hatete Elvis Martins.
‘’Kona- ba afetadu ne’e São Miguel hetan afetadu husi Estrada ninian, entaun nia halo karta ba Estadu aseita hodi fó fali rai seroja ne’e, ami seroja ne’e hetan afetadu entaun ami husu ba Governu se karik bele ami halo fali karta ida ba estadu , estadu bele fó rai id aba ami bele ga lae? Estadu la fó rai diak liu estadu deporta deit ami ba nasaun seluk tamba la presiza ami povu,’’ Tenik Afonso Seran.
Hatán ba preokupasaun ne’e, Vise Ministru Óbra Públika, Nicolau Lino Freitas, aponta komunidade sira-nia preokupasaun, no sei diskuti molok implementa.
‘’SETP informa ba obra públika katak rai mamuk mak seroja, entaun prontu ita bo’ot sira foti ona konkordansia iha ona mak ne’e, rai ne’e Estadu, se São Miguel nia atu konstrói karik nia tenke selu arendamentu, katak nia tenke selu taxa ba Governu kada fulan, prontu ida ne’e taxa ba Governu, ne’ebé rekezitus ida mak se nu kazu konstrui duni nia tenke selu arendamentu aluga ba Estadu. Governu sei tau prioridade atu halo kompensasaun ba ita bo’ot sira-nia uma,’’deklara Nicolau Lino Freitas.
Governante ne’e informa, Governu sei prepara kondisaun ba komunidade sira, ne’ebé afeta ba konstrusaun refere, molok entrega rai Seroja ba eskola.
Antes ne’e, Governu muda ona komunidade ne’ebé hela besik estrada ibun husi suku Madohi nian, no eskola São Miguel mak Governu seidauk hasai, tamba sei prepara rai ba eskola refere. Ben
