Ofisiál Tribunál Distritál Díli (TDD) halo ezekusaun ba disputa rai entre sidadaun Xina na’in rua iha área Fomento II, Suku Comoro, Postu Administrátivu Dom Aleixo.
Ezekusaun ne’e, Ofisiál Tribunál Distritál Díli, hala’o iha Kinta (31/03/2022) entre rekeridu When Chuns Siang no rekerida Zhang Ming iha área Fomento II.
Iha ezekusaun, ofisiál tribunál konsege prende xave kuartu uma nian hamutuk sia no xave portaun bo’ot husi rekerida Zhang Ming.
Defensór Públiku, Estaqui Guterres, defende nia kliente husi rekeridu Zhang Ming.
Estaqui Guterres, hateten, ofisiál tribunál prende xave sira ne’e, tanba konsidera rekerida Zhang Ming okupa uma ne’e ho ilegál.
“Hakarak esplika de’it ba prosesu ida ne’e prosesu sivíl entre rekerente ho rekerente. Rekeridu rasik hanesan rai nain agora nia halai tiha ona ba rai-liur. Antes ne’e sira iha akordu ida kona-bá impréstimu kuandu patraun ne’e rasik halai tiha ba Xina entaun rekerida ida agora dadauk ne’e la’ós hanesan patraun, maibé nia hanesan funsionáriu hotu depois nia halo impedimentu ba atividade rekerente When Chuns Siang, ne’ebé mak ba-mai iha fatin ida ne’e. Ne’ebé antes ne’e rekerente ho nia kolega ida halai tiha ona aluga ba rai na’in entaun ida ne’e ami halo prosesu ba tribunál atraves cautelar provizóriu ba posse. Ho ida ne’e mak tribunál halo ezekusaun hodi entrega pose provizóriu ba iha rekerente”,esplika Defensór Públiku, Estaqui Guterres, ba jornalista sira iha Fomento II, Díli.
Advogadu privadu Fernando da Costa, defende nia kliente rekerida Zhang Ming, tanba durante hela iha área Fomento, konsege fó servisu ba Timor-oan sira, iha área produsaun batako.
Tanba ne’e, nia husu ba ofisiál tribunál bainhira ezekuta mandadu ruma tenke fiksu, la’ós uza forsa hodi prende buat hotu.
“Ha’u dehan ida ne’e asaun derepente ne’ebé mak tribunál ezekuta, sira ofisiál no Polísia sira normalmente iha desizaun husi tribunál sira mai halo sita ba objetu refere, mas hanesan defeza ohin ita bo’ot sira rona, ha’u mai, ha’u hateten atu sita tenke define ida ne’e mak presiza atu sita, tanba ida ne’ebé desizaun hakerek metru kuadru hira, ida ne’e mak presiza atu sita. Maibé ohin sira dehan atu para hotu entaun iha ne’e traballadór kuaze 35 mak servisu, se ita hotu traballadór sira atu ba buka fali osan iha ne’ebé? Agradese ba kompañia ne’ebé fó servisu ba ita-nia traballadór sira se para hotu sei prejudika”, dehan Fernando da Costa.
Fernando mós promete, sei halo rekursu ba Tribunál Rekursu, hasoru rekeridu When Chuns Siang, bainhira hetan autorizasaun husi nia rekerida Zhang Ming.avi
