GMN TV Justica e Segurança Kazu Gastão Sousa ho Pe. Martinho, Eis Ministru Gastão nia oan ba husu bebeik kombustivel iha MOPTC

Kazu Gastão Sousa ho Pe. Martinho, Eis Ministru Gastão nia oan ba husu bebeik kombustivel iha MOPTC

0 views

Tribunal Distrital Dili, Sesta (4/5), kontinua halao julgamentu ba kazu krime pekulatu, administrasaun danoza no falsifikasaun dokumentus ne’ebe deskonfia involve eis Ministru Obras Públikas Transportes e Comunicasõens (MOPTC), Gastão de Sousa, Padre Martinho Gusmão, inklui Gastão de Sousa nia oan, Jordão Maria de Jesus da Silva Sousa, Ferlio Afonso Bado Loi da Silva Sousa ho mos  Diogo da Costa, nudar funsionariu públiku iha MOPTC,.

Iha audensia julgamentu, testamuña Filomino de Fatima deklara katak, kareta ne’ebe ADB oferese ne’e, dala ruma para iha arguidu Gastão nia uma no nia oan Jordão Sousa mak uza bebeik ba privadu, depois ba husu kombustivel iha Ministerio Obras Públikas Transportes e Comunicasõens (MOPTC) ne’ebe oferese husi ADB.

 “Kareta hau lori ne’e ho nia numeru matricula 18-948 TL, babain para iha Gastão nia uma no Jordão mak uza bebeik dala ruma Ferlio mos uza no kareta ne’e ADB mak fo mina, tan ne’e Jordão uza kareta ne’e ba husu mina iha MOPTC,’’ dehan sasin ne’e ba tribunal.

Nia mos informa kona ba kombustivel ne’e, MOPTC uza nia naran mak fo ba ADB hodi foti mina, maibe hafoin nia la lori ona kareta, Jordão ka ema seluk ba foti mina ne’e uza nia naran, maibe nia la asina, maske nune’e sasin ne’e senti la prejudikadu ba nia asinatura ne’ebe ema seluk falsifika hodi foti kombustivel.

Alende ne’e kareta ne’e mos dala ruma lori ba municipiu Manufahi hodi survei projetu sira ne’ebe mak lao iha municipiu refere.

Kona ba fo kareta ba parte igreja ne’e sasin haktuir nia la iha kuñesmentu, tanba nia kargu hanesan deit motorista nia la iha informasaun.

Ba kazu ne’e rasik Ministériu públiku akuza no rekere julgamentu iha prosesu komum bazeia ba artigu 236 no 48 no.2 alínea d, kódigu prosesu penál hasoru arguidu  Gastão Francisco de Sousa, atuál Ministru Ministerio Obras Públikas Transportes e Comunicasõens (MOPTC), Diogo da Costa nudar funsionáriu publiku no atuál xefe Gabinete MOPTC, Jordão Maria de Jesus da Silva Sousa ne’ebé  koñesidu ho “Jordy Sousa”, oan husi Gastão de Sousa, Ferlio Afonso Bado Loi da Silva Sousa koñesidu ho “Viali”, funsionário Públiku iha Ministériu Negosiu Estranjeiru no Kooperasau (MNEC) no Martinho Gusmão, saserdote katóliku iha paroquia Santo António Manatuto.

Iha loron 28 fulan Fevereiru 2010 asina akordu entre Governu RDTL ho Asian Development Bank (ADB), projetu finansiamentu  ho montante orsamentu hamutuk $ 46.000.000 ne’ebé atribui ba fundu ba reabilitasaun no konstrusaun Estrada.

Projetu refere remata iha tinan 2012 no tenki entrega fila fali osan hosi fundu ne’ebe la utiliza ho montante $ 82.776,77 dolares Amerikanu inklui viatura 8.

Entre viatura hirak ne’ebe MOP simu konsta viatura ho matrikula  18-948 TLS ho marka toyota land cruiser  no viatura ho numeru matrikula 19-754 TLS ho marka toyota kijang innova ne’ebe entrega ba arguido Diogo da Costa.

Na realidade fo konesimentu de’it ba viatura rua seluk ho matrikula 18-723 TLS ho marka toyota rav 4 no viatura 18-947 TLS ho marka  toyota land cruiser prado.

Hafoin simu viatura hirak ne’e, tuir instrusaun verbal hosi arguidu Gastao de Sousa, la fo koñesimentu ba departamentu logistika no MOP kona ba simu viatura hirak ne’e.

Konkordansia no kolaborasaun hirak ne’e ho intensaun hodi oinsa bele halakon rejistu viatura rua ne’e hanesan partimoniu estadu nian.Tuir planu ne’ebe sira halo ona maka iha loron 24 fulan Setembru 2012, arguido Gastão komunika ba ADB kona-ba nia desizaun atu atribui viatura rua ho matrikula 18-948 no 19-754 ba unidade jestaun projetu nian inklui manutensaun no abastesimentu kombustivel ne’ebe finansia hosi ADB.

Maibe realidade hatudu katak viatura ho matrikula 18-948 rai hela iha Gastão de Sousa nia rezidensia iha aldeia Becusi bawah, suku Becora.

Arguidu Gastão de Sousa mos permite arguidu nain rua Jordy no Viali hodi utiliza veikulu ba titulu pesoal durante sira nia paseiu iha sidade laran.

Iha data ne’ebe la konkretu, iha final fulan Abril ka meadu fulan Maio 2014, arguidu Martinho Gusmão solisita verbalmente ba arguidu Gastão Sousa hodi husu ajuda viatura ida ba preparasaun serimonia komemorativa tinan 200 paroquia Manatuto nian no iha loron 13 fulan Maio 2014 arguidu Gastão Sousa entrega pesoalmente viatura ho matrikula 19-754 TLS ne’ebe uza hela ba titulu privadu hosi arguidu Diogo da Costa.

Arguido Martinho Gusmão utiliza viatura refere durante tinan 1 fulan 3 no bainhira uza viatura refere Martinho Gusmão solisita dala 2 ba Gastão Sousa hodi halo manutensaun  ba viatura iha loron 14 fulan Junho 2014 no loron 28 Agostu 2014 ne’ebe uza osan husi fundu ADB nian ho montante $ 532,34 dolar amerikanu.

Bazeia ba akuzasaun hirak ne’ebe iha maka konsidera katak bens no ekipamentu hirak ne’ebe sira uza pertense ba Estadu, mezmu nune’e, sira aproveita patrimoniu publiku ba benefisiu propriu maski hatene katak aktu sira ne’e prezudika Estadu.

Nune’e, arguidu Gastão de Sousa hetan akuzasaun primeiru husi MP ho krime pekulatu kontra artigu 295 no. 1& 3 ba autoria material ho arguidu Diogo da Silva, segundu, krime pekulatu ida seluk maka kontra artigu 295 no. 1, 41no 34 ba autoria material ho arguidu Jordy Sousa no Viali, terseiru maka krime administrasaun danoza kontra artigu 274, no 2 & 3 ba kumplisidade ho arguidu Martinho Gusmão.

Arguidu Diogo da Costa MP akuza ho primeiru, krime pekulatu, iha artigu 295  no. 1& 3 ba autoria material ho arguidu Gastão de Sousa, segundu nafatin ho krime pekulatu hosi artigu 295 no 41 no terseiru maka krime falsifikasaun dokumentu  kontra artigu 303 no 1 alinea A no 41.

Arguidu Jordy sousa no Viali komete iha co-autoria material ne’ebe MP akuza ho krime pekulatu kontra artigu 295, no 1, 41 no 34 ba autoria material ho arguidu Gastão de Sousa.

Arguidu MG komete ba kumplisidade material ne’ebe MP akuza ho krime administrasaun danoza kontra artigu 274, no 2 & 3 ba kumplisidade ho arguidu Gastão  Sousa.

Audensia julgamentu ne’e  adia fali ba loron 29 fulan Maio tuku 09:30 hodi kontinua rona testamunha.

Julgamentu ne’e prejidi husi juis koletivu, Albertina Neves, Antonio do Carmo, Zumiaty Freitas, Ministeriu Publiku reprezenta husi prokuradora Lidia Soares ho Jacinto Babo, arguido sira hetan asistensia legal husi defensor publiku Fernando Carvalho, Estaqui Guterres ho Cancio Xavier.Nia


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker