Diresaun Nasionál Prevensaun Konflitu Komunitária (DNPKK) identifika Suku Ailok Postu Administrativu Cristo-Rey Munisípiu Díli, risku ba konflitu, tanba problema entre joven sira.
Atu redus konflitu iha Suku Ailok, Kinta (23/05/19) DNPKK sosializa lei númeru 5/2017/ armas brankas ba joven sira hodi halo prevensaun ba konflitu, iha laran no iha Becora rasik.
“Suku Ailok hanesan Suku foun, ne’ebé mak iha Bekora, parte seluk mós ami identifika Suku ida ne’e sai hanesan, Suku ne’ebé mak iha ami nia planu tinan 2019, hodi halo edukasaun sivika, ami identifika mós joventude ne’ebé mak iha Suku ida ne’e dala barak liu involve iha konflitu sira”,esplika Xefe Departementu Prevensaun konflitu Martinho Carvalho Sarmento.
Alende ne’e,Administrador Postu Administrativu Cristo-Rey, Gaspar da Silva, apresia tebes ho programa sosializasaun ida ne’e, atu nune’e joven sira bele prevene a’an husi aktu krimi, hodi kontribui ba estabilidade.
“Dala ruma ita nia joven sira partisipa iha problema, dala ruma sira la hatene atu halo prevensaun. Tanba ne’e mak liu husi sensebilizasaun ne’e joven sira bele koñesimentu, wainhira atu halo problema ruma, sira senti ladun diak”,dehan Gaspar da Silva.
Nune’e mós Komandante Polísia Komunitária Nasionál Superintdente Assistente José da Luz, partisipa mós iha sosializasaun ne’e, hodi esplika kona-ba impaktu alkoliku no tráfiku humanu.
“Ida ne’e parte kooperasaun ida ne’ebé mak durante ne’e la’o hamutuk ho DNPKK oinsa mak atu bele fahe informasaun importante ba joventude, liu-liu oinsa atu prevene hahalok sira ne’ebé atu lori sira ba krimi,”dehan José da Luz.
Nune’e mós Xefe Suku Ailok, Mario do Rêgo, agradese Ministério Interior ne’ebé mak hala’o sosializasaun prevensaun konflitu ba ninia joven sira.
Aktividade sosializasun ne’e hala’o durante loron ida tomak iha sede Suku Ailok Postu Administrativu Cristo Rey/ Munisípiu Díli.avi
