Xefi Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timur, deklara, tanba komplikasaun iha lei, Vise Xefi Estadu Maior F-FDTL Brigadeiru Jeneral (BrigJen), Filomeno Paixão, seidauk simu posse husi Prezidente Repúblika (PR), Francisco Guterres ‘Lú Olo’ ba Ministru Defeza.
“Nia (Filomeno Paixão-red) seidauk simu tomada de posse, tanba komplikasaun iha lei. Tanba ne’e presiza Governu tenki husu fali PR atu ezonera, antes PR ezonera tenki konvoka tan Konsellu Superior Defeza no Seguransa,”Lere Anan TImur ba jornalista sira hafoin remata enkontru ho PR, iha Palasiu Prezidensial, Bairo Píte, Díli, Tersa (26-06-2018).
Nia esplika, nuudar Xefi Estadu Maior F-FDTL aprova tiha ona karta rezignasaun husi Vise Xefi Estadu Maior F-FDTL BrigJen, Filomeno Paixão, maibé tanba hirarkia entaun tenki tuir prosesu.
“Ba ha’u reforma ne’e ha’u nia direitu, ema ida la impede. Agora BrigJen, Filomeno Paixão husu atu reforma no ha’u nuudar Xefi Estadu Maior Jeneral, ha’u aprova tiha ona, ha’u dehan deferidu o requerimento de reforma ona no entaun por questão hirarkia, ha’u tenki haruka ba Governu no haruka mós mai PR,” haktuir Major Jeneral Lere Anan Timur.
Entretantu iha loron 19, fulan ida ne’e, Vise Xefi Estadu Maior F-FDTL BrigJen, Filomeno Paixão, entrega karta rezignasaun ba Xefi Estadu Maior F-FDTL Lere Anan Timur, hodi hetan aprovasaun no iha loron 20, fulan ida ne’e mós Lere Anan Timur aprezenta ona dokumentus rekoñesementu husi BrigJen Paixão ba PR Lú Olo.ves
