Xefi Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timur Kuarta (27/6), sei akompaña Prezidente Repúblika (PR), Francisco Guterres ‘Lú Olo’ hala’o vizita Estadu ba Jakarta-Indonesia, durante loron rua nia laran.
“Ha’u ho ha’u-nia Brigadeiru Jeneral (BrigJen) sira mai hasoru PR, tanba ita hotu hatene katak aban (ohin-red) PR dezloka ba Jakarta ho situasaun polítika hanesan ne’e, ha’u hateten PR Lú Olo labele kansela konvite Indonesia segunda vez atu ba Jakarta, tanba Indonesia ho ita-nia país viziñu, hakarak ka lakohi ita tenki ba, porque ita la ba ema hanoin buat oi-oin, entaun tanba ida ne’e maka nia bolu ami nain 4 mai hasoru PR situasaun hirak ne’e ba ami,”Xefi Estadu Maior F-FDTL ba jornalista sira hafoin remata enkontru ho PR, iha Palasiu Prezidensial, Bairo Píte, Díli, Tersa (26-06-2018).
Nia esplika, tanba ne’e Lere Anan Timur delega ona Vise Xefi Estadu Maior F-FDTL BrigJen, Filomeno Paixão, asumi responsabilidade forsa defeza ninian.
“PR mós fó responsabilidade ba Jeneral sira ne’ebé maka hela, tanba ha’u mós aban (ohin-red) ho PR ba Jakarta no entaun ha’u delega ha’u-nia Vise Filomeno Paixão maka asumi internamente ha’u-nia servisu iha Timor,” haktuir Xefi Estadu Maior F-FDTL, Major Jeneral Lere Anan Timur.
Tuir ajenda vizita ofisial Xefi Estadu ba Jakarta-Indonesia ne’e sei halo durante loron rua (2), hahú husi loron 27 to’o loron 29 fulan Juñu, no asuntu ne’ebé maka Estadu rua ne’e sei koalia maka kona-bá relasaun bilateral no fronteira ninian.
Entretantu tuir ajenda PR Lú Olo mós sei partisipa simeira Comunidade dos Países de Língua Portuguêsa (CPLP), iha Cabo-Verde iha fulan Jullu, tinan ida ne’e.ves
