GMN TV Justica e Segurança Lere: Koronel nain 4 merese promove ba BrigJen

Lere: Koronel nain 4 merese promove ba BrigJen

0 views

Xefi Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timur deklara, Koronel nain haat (4) hanesan Koronel Domingos Raul ‘Falur Rate La’ek’, Américo Ximenes ‘Sabika Besi Kulit’, Cornélio Ximenes ‘Mau-Nana’ no João Miranda ‘Aluc Descartes’ merese sai Brigadeiru Jenerais (BrigJen) F-FDTL, tanba sira-nia dedikasaun hodi komanda funu durante tinan 24 kontra okupasaun Indonesia.

“Ha’u hakarak hato’o kongratulasaun ba ha’u nia Koroneis nain 4, ne’ebé hetan dau-daun promosaun ba BrigJen, imi nain 4 merese duni atu hetan promosaun ida ne’e, tanba imi nia dedikasaun komando, jestaun no lideransa ida ne’ebé diak, ne’ebé hatudu tiha ona durante funu tinan 24 nia laran, tanba ne’e maka promosaun ida ne’e ita hili modalidade ida hanaran promosaun por distincão tuir estatuto dos militares das F-FDTL,” Xefi Estadu Maior F-FDTL liu husi ninia diskursu iha serimonia promosaun Koronel nain 4 ba BrigJen F-FDTL, iha Palasiu Prezidensial, Bairo Píte, Díli, Kinta (07-06-2018).

Nia esplika, jestu ida ne’e halo husi VII Governu konstitusional, hanesan rekoñesementu ida ba virtude ka hahalok diak no sira-nia experiensia asumi funsaun polítika hanesan parte ida husi prosesu luta nia laran, ne’ebé sira fó tiha ona ba rai no povu Timor-Leste.

“Hakarak agradese mós ba VII Governu konstitusional ninia vontade polítika, ne’ebé iha hodi rekoñese ita nia Koroneis veteranus hanesan Sabika Besi Kulit, Falur Rate La’ek, Aluc Descartes no Mau-Nana, tanba sira nain 4 ne’e uluk iha experiensia hanesan lidera, jere no komanda gerilleirus FALINTIL sira iha situasaun difisil no komplikadu nia laran, tantu iha nivel kompaña, unidade no nivel rejiaun ninian,” haktuir Major Jeneral Lere Anan Timur.

Xefi Estadu Maior F-FDTL ne’e hato’o agradese mós ba Prezidente Repúblika (PR), Francisco Guterres ‘Lú Olo’, tanba dekreta proposta promosaun Koronel nain 4 husi VII Governu.

“Hakarak agradese mós ba PR ninia desizaun aseita proposta do promosaun Koroneis nain 4, ne’ebé hato’o husi VII Governu konstitusional. PR hatene duni no rekoñese no valoriza ita nia veteranu sira ne’ebé maka aktivu hela iha F-FDTL nia laran, tanba sira presta servisu ida ne’ebé que extraordinariu ba ita nia rai no povu Timor-Leste, hafoin liberta tiha ita nia rai,” hateten Lere Anan Timur.

Nia akresenta, Timoroan hotu-hotu labele haluha ejemplu ida ne’e, tanba ne’e serve ba jerasaun foun atu banati sakrifisiu sira ne’ebé maka sura labele, hodi servi povu no nasaun.

“Hein katak VIII Governu konstitusional sei kontinua jestu ida ne’e iha sira nia ukun durante tinan 5 nia laran, tanba sei iha ofisiais veteranus no sarjentu sira barak maka servisu makaas no aktivu hela iha instituisaun F-FDTL nia laran,” Xefi Estadu Maior F-FDTL ne’e espera.

PR Lú Olo promove ofisial superior, Koronel Domingos Raul ‘Falur Rate La’ek’ ho dekretu PR númeru 14/2018, Américo Ximenes ‘Sabika Besi Kulit’ ho dekretu PR númeru 15/2018, Cornélio Ximenes ‘Mau-Nana’ ho dekretu PR númeru 16/2018 no João Miranda ‘Aluc Descartes’ ho dekretu PR númeru 17/2018. ves


Banner

Foto

Notisia Ikus

UDT apoia dada bee-moos ba komunidade iha Vatu-Vou

October 26, 2021
Partidu Uniaun Demokrátiku Timor (UDT), apoiu f...

KSDS-KE rekomenda PR haruka pedidu estensaun EE ba PN

October 26, 2021
Xefe Casa Civíl Prezidénsia Repúblika, Franci...

Kandidatu ajente administrasaun 93 “kesar” MEJD ba PN

October 26, 2021
Kandidatu Ajente Administrasaun (AA) 93 ne’eb...

CNRT “deteta” artigu balu iha LEO inkonstitusionál

October 26, 2021
Deputada bankada CNRT, Fernanda Lay, deteta, pro...

JFP-ADDD: Jornada polítika iha TL la tuir K-RDTL

October 25, 2021
Movimentu Junta Forsa Polítika Aliadu Defende D...
1 2 3 655

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker