Komando Polísia Nasional Timor-Leste (PNTL), Munisípiu Díli, sei hatun membru pelutaun tolu (3) hodi fó seguransa ba tomada de posse membru VIII Governu konstitusional iha tempu badak ne´ebé tuir planu sei hala´o iha Palasiu Nobre, Lahane, Díli.
``Komando PNTL iha atus hat (400) resin ami la´os koloka hotu-hotu ba iha fatin ne´eba, maibe ami prepara pelutaun tolu. Pelutaun tolu, kada pelutaun nain tolu nulu (30). Pelutaun tolu ne´e kuaze 90 pesoas, apoiu tan husi Unidade Espesial nune´e mós husi Polísia Militar. Agora ami hein de´it data bainhira mak atu halo tomada de posse,``esplika Segundu Komandante PNTL Munisípiu Díli Superintendente Xefe Euclides Belo, ba jornalista sira Tersa (19/06/18), iha Kuartel PNTL, Díli.
Euclides Belo, hatutan, bainhira tomada de posse, dalan diresaun husi Munisípiu Aileu sei kanaliza liu fali husi Aituri-Laran, atu nune´e seremonia tomada de posse ne´e la´o bele iha dignidade, labele iha seremonia tomada de posse ba membru orgaun soberanu kareta ho motor la´o trankadu.
``Hanesan mós parlamentu Nasional kuandu tomada de posse mais formal nivel orgaun soberanu nia seremonia ami blokea dalan, públiku nia dalan ami buka alternativa seluk para sira la´o tuir. Tanba ne´e mak iha ona data ba tomada de posse ami sei fasilita bainaka no diplomata sira no autoridade seluk bele la´o avontade no sira-nia kareta para fatin mós iha,``dehan Euclides Belo.
Entretantu iha reuniaun troka sesaun IV lejislatura ba mandatu V Lejislatura Parlamentu Nasional, hala´o iha loron 13 fulan ne´e. Komando PNTL Munisípiu Díli hatun efetivus 250, hodi garante seguransa iha resintu Parlamentu Nasional no apoiu mós husi Unidade Espesial Polísia (UEP) no Polísia Militar (PM).avi
