Iha posibilidade Komando Polísia Nasionál Timor-Leste (PNTL), sei hala’o transferénsia ba ninia Komandante PNTL munisípiu Díli Superintendente Xefe Armando Monteiro, hodi koloka fali iha parte leste hodi lidera PNTL munisípiu Baucau no Komandante Polísia Nasionál Servisu Investigasaun Kriminál Superintendente Xefe Henrique da Costa sei komanda fali PNTL munisípiu Díli.
Tuir informasaun Polísia, Komando PNTL la’os hala’o de’it transferénsia ba ninia ofisiaíais na’in rua ne’e, maibé sei hala’o mudansa mós ba estrutura sira seluk, kompostu husi Diretór Nasionál Migrasaun Superintendente Xefe Agostinho Gomes, sei koloka fali ba PNTL munisípiu Ermera hodi troka Superintendente Natercia Martins ne’ebé mak tuir planu sei koloka fali iha Díli.
Komandante Unidade Patrullamentu Fronteira Superintendente João Belo sei hala’o fali transferénsia fali mai Díli hodi asumi kargu foun iha hanesan Diretór Nasionál servisu Migrasaun Timor-Leste no Segundu Komandante UPF Superintendente João Sancho Pires, sei komanda fali UPF.
Alende ne’e Komandante PNTL munisípiu Baucau Hermenegildo Gonçalves da Cruz, posibilidade sei komanda fali Servisu Informasaun Polísia, hodi troka Superintendente Xefe José Neto Mok, ne’ebé mak tuir planu sei koloka fali iha departementu sira seluk iha komando jerál Polísia.
Segundu Komandante PNTL munisípiu Bobonaro Superintendente Joao da Costa sei komanda fali PNTL munisípiu Manatutu hodi troka Superintendente Júlia Gama, ne’ebé mak sei koloka fali iha Departementu Jender PNTL.
Superintendente Umbelina Soares, sei komanda PNTL munisípiu Liquisa hodi troka Superintendente Assistente Luis da Silva, ne’ebé sai Segundu Komandante Liquisa.
Ofisiais superior sira ne’e, tuir planu sei simu posse iha Tersa (30/06/20), husi Komandante Jerál PNTL Komisáriu Faustino da Costa, iha Kuartel Jerál PNTL Caicoli Díli.avi
