Segundu Komandante Polísia Munisípiu Díli Superintendente Euclides Belo, esplika, durante fulan Janeiru to’o fulan Juñu ne’e, Tránzitu hatama reseita ho montante USD 18, 748 ba kofre Estadu.
“Ita hasoru pandemia COVID-19. Tanba ne’e mak iha fulan Janeiru to’o fulan Juñu semana ne’e PNTL rekolla taxa husi sidadaun sira ne’ebé mak kondus kareta no motorijada hetan infrasaun, para sala, balun kontra sinais Polísia, la uza kapaseti no asesor sira seluk, hanesan sapa matrikula no lampu piska-piska, kuandu laiha ita prende haruka pasa multa tanba viola lei kódigu estrada númeru 6/2003. Tanba ne’e mak hahú husi Janeiru to’o fulan Juñu ne’e, semana dala rua nian, ita rekolla ona montante dolar Amerikano husi infratór sira hamutuk 18,748”,esplika Segundu Komandante Polísia Munisípiu Díli Superintendente Euclides Belo, ba jornalista sira iha Kuartel PNTL Caicoli Díli.
Euclides Belo akresenta, osan sira ne’e la’os Polísia ba hatama diretamente iha Banku Nasionál Komersiu Timor-Leste, maibé infratór ida-idak mak kaer kuitansia hodi ba selu iha banku, hafoin sira mai hatudu kuitansia ba Polísia, hafoin entrega fila-fali sira-nia transporte.
Alende ne’e, membru tránzitu munisípiu Díli iha Kinta (18/06/20) kontinua hala’o operasaun hodi prende motorizada hamutuk neen no kareta tolu, iha área Pateo, tanba para iha trotoar leten no para iha zebra cross leten.
“Ita hatene Pateo ida ne’e husi loron ba loron ita sempre apelu hela ba ita nia komunidade sira para bele respeita lei, la’os respeita Polísia, ami husu ba komunidade sira atu respeita lei, labele sira nia intensaun ne’e tauk mak Polísia, la tauk lei, ida ne’e lalos, tauk lei tanba lei mak fó póder ba Polísia hodi atua”, dehan Komandante Tránzitu munisípiu Díli, Inspetór Domingos Sarmento.
Tuir tabela infrasaun, para iha zebra cross sei selu multa USD 45.00, iha Banku Nasionál Komérsiu Timor-Leste (BNCTL-sigla Portugés). avi
