Komandante Jeral (KomJer) PNTL, Komisáriu Faustino da Costa hato’o asuntu ne’e, hafoin remata selebrasaun misa ba loron Santu António ne’ebe hanesan padrueriu PNTL ni’an iha Sentru Formasaun Polísia (CFP), Comoro-Díli (13/06/2020).
Faustino rekoñese, durante ne’e kazu oknum Polísia barak liu mak sei pendente hela iha komandu jerál PNTL no kazu sira ne’e rejistadu hahú husi 2010 to’o agora.
Tanba ne’e Líder máximu PNTL ne’e kompromete, sei tenta lori kazu sira ne’e tuir dalan justisa ni’an.
“Loos duni PNTL sei iha kazu lubuk ida mak sei iha ne’ebá, tanba ne’e mak ita tenta halo oinsá atu hadia para buat ne’e labele akontese, ne’e loos duni se kazu 2010,2011,2012 to’o ohin loron, agora ita bo’ot sira hatene ka lae, KomJer iha kompeténsia hahú hosi 27 marsu, 2019 ita sei tenta haree mais ou menus oinsá para kazu sira ne’e ita hadia no ida ne’ebé mak saida ita haree nia prosesu ne’e halo loos, tanba ne’e ohin ha’u dehan hadia ho maneira oi-oin, reforsa ema iha deparamentu justisa, halo kapasitasaun ba pesoal sira iha ne’ebá, para sira hatene oinsá bele hala’o sira nia servisu, karik iha lakuna iha parte legalidade, ha’u hanoin ne’e buat seluk ida ami rekomenda ba governu atu haree ida nee” KomJer PNTL ne’e hafoin remata misa selebrasaun Santu António, iha DFP-Comoro.
Fautino mos informa, iha tinan 2018 to’o 2019 komandu jerál rejistu kazu hamutuk 200 resin, maibé seidauk konta ho tinan 2010 to’o 2017.
Alende ne’e komisáriu jerál liuhosi konsellu superior PNTL foin lalais ne’e propoin membru PNTL na’in 8 ba Ministériu Interior Interrinu hodi halo demisaun.
Maibé Ministru Interior Interinu deside de’it membru polísia na’in 6 mak tama iha lista demisaun, tanba komete krime, no na’in 2 fila fali ba komandu jerál. san
